Հայկական ընդդիմությունը հայտարարություն է տարածել Ալիև-Փաշինյան հանդիպման արդյունքներով

Հայաստանի ընդդիմությունը, որը պահանջում է վարչապետ Նիկոլ Փաշինյանի հրաժարականը, հայտարարություն է տարածել Բրյուսելում Փաշինյանի, Ադրբեջանի նախագահ Իլհամ Ալիևի և Եվրոպական խորհրդի նախագահ Շառլ Միշելի միջև կիրակի օրը կայացած հանդիպման արդյունքներով, որում ասվում է՝ Նիկոլ Փաշինյանի վարած քաղաքականությունը դեմ է Հայաստանի շահերին, սպառնում է պետության գոյությանը, նպաստում է Ղարաբաղի հայաթափմանը:

Ինչպես գրում է «ՌԻԱ Նովոստի»-ն, Հայաստանի կառավարության մամուլի ծառայությունը հայտնել է, որ մայիսի 22-ին Բրյուսելում Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի և Եվրոպական խորհրդի նախագահ Շառլ Միշելի հանդիպման արդյունքներով «պայմանավորվածություններ են ձեռք բերվել տարածաշրջանային կոմունիկացիաների բացմանն ուղղված աշխատանքների հետագա ընթացքի, սահմանների սահմանագծման ու անվտանգության հարցերով հանձնաժողովի աշխատանքների մեկնարկի վերաբերյալ»:  

«Եվրոպական խորհրդի նախագահ Շարլ Միշելի միջնորդությամբ Բրյուսելում տեղի ունեցած Փաշինյան-Ալիև հանդիպման արդյունքները ևս մեկ անգամ հաստատեցին այն պնդումները, որ հայ-ադրբեջանական բանակցություններն ամբողջությամբ ընթանում են ադրբեջանական օրակարգով... Նիկոլ Փաշինյանի վարած քաղաքականությունը դեմ է Հայաստանի ու Ղարաբաղի շահերին, սպառնում է մեր պետության գոյությանն ու հանգեցնելու է Հայաստանի թրքացմանը, նպաստում է Ղարաբաղի հայաթափմանը», - ասված է «Դիմադրություն» շարժման հայտարարության մեջ, որը զետեղված է «Հայաստան» դաշինքի թելեգրամյան ալիքում:

«Շարլ Միշելի տարածած հայտարարության մեջ որևէ խոսք չկա պարտադիր իրավական ուժ ունեցող Հայաստան-ԵՄ ՀԸԳ համաձայնագրով ամրագրված՝ Ղարաբաղի ժողովրդի ինքնորոշման իրավունքի, ինչպես նաև ԵԱՀԿ Մինսկի խմբի համանախագահների մանդատի մասին: Չի խոսվում անգամ Լեռնային Ղարաբաղի կարգավիճակի որոշման անհրաժեշտության մասին, ինչը հակասում է 2020 թվականի նոյեմբերի 19-ին Եվրոպական Միության անունից արված հայտարարությանը։

Կողմերը խուսափել են անգամ «Լեռնային Ղարաբաղ» և «Լեռնային Ղարաբաղի ժողովուրդ» եզրույթներից: Փոխարենն օգտագործվել է «Ղարաբաղի էթնիկ հայկական բնակչություն» ձևակերպումը և խոսվել է Ղարաբաղի հայերի անվտանգության և իրավունքների մասին, որոնք պետք է ապահովի Ադրբեջանը», - նշվում է հայտարարության մեջ: