Հունգարական ընկերությունները 2024 թվականից կմասնակցեն Ղարաբաղի վերականգնմանը Սիյարտո

«Հունգարական խոշորագույն ընկերություններից կազմված կոնսորցիումը հաջորդ տարվանից կմասնակցի՝ Ադրբեջանի Ղարաբաղի տարածաշրջանի Սոլթանլը գյուղի վերականգնմանը»,- ասել է Հունգարիայի արտգործնախարար Պետեր Սիյարտոն։

Այս մասին հայտնում է Caliber.Az-ը՝ հունգարական The Budapest Times թերթին հղումով։

Ադրբեջանի տնտեսության նախարար Միքայիլ Ջաբբարովի հետ համատեղ մամուլի ասուլիսում Սիյարտոն ասել է, որ երկու երկրները չափազանց հավատարիմ են կապերի հետագա զարգացմանը։

Սիյարտոն կարևոր ձեռքբերում է անվանել Հունգարիայի մասնակցությունը Ղարաբաղի վերականգնմանը՝ հավելելով, որ վերականգնման ծրագրերն արդեն հաստատվել են, և համապատասխան պայմանագրերի մասերն ստորագրվել են։

Նախարարը նշել է, որ այս տարվա սկզբին Հունգարիան սկսել է բնական գազի ներկրումն Ադրբեջանից համաձայնագրով, որը նախատեսում է տարեկան 100 մլն խորանարդ մետր գազի ներկրում։ Դրա հետ մեկտեղ նա հավելել է, որ այդ ծավալների ավելացումը կպահանջի «Եվրամիության կողմից միջոցներ ձեռնարկել՝ Հարավարևելյան Եվրոպայում ենթակառուցվածքների զարգացմանը աջակցելու համար»: