«Մենք բարձր ենք գնահատում, որ եղբայրական Թուրքիան մեր կողքին էր Ղարաբաղյան Երկրորդ պատերազմի ժամանակ» Ալիևը՝ Էրդողանին

Նախագահ Իլհամ Ալիևը շնորհավորական ուղերձ է հղել Թուրքիայի նախագահ Ռեջեփ Թայիբ Էրդողանին այդ երկրի ազգային տոնի՝ Հանրապետության օրվա կապակցությամբ։

Ինչպես հայտնում է Caliber.Az-ը, այս մասին տեղեկությունը տարածել է պետության ղեկավարի մամուլի ծառայությունը։

Շնորհավորական ուղերձում ասվում է.

«Հպարտությամբ ուզում եմ նշել, որ բարեկամության և եղբայրության հիման վրա կառուցված Ադրբեջանի և Թուրքիայի հարաբերություններն այսօր աշխարհում նմանը չունեն։ Մեր եղբայրությունը, միասնությունն ու համերաշխությունը, որոնք մեր նախնիների հոգևոր ժառանգությունն են, հանդիսանում են մեր ժողովուրդների համար հիմնական ուղենիշ, տարածաշրջանի և աշխարհի անվտանգության և կայունության կարևոր գործոն։

Մենք միշտ բարձր ենք գնահատում և երբեք չենք մոռանում, որ եղբայրական Թուրքիան, որը պատմության ամենակարևոր պահերին հենարան է եղել Ադրբեջանի համար, մեր կողքին էր նաև Ղարաբաղյան Երկրորդ պատերազմի ժամանակ, թուրք ժողովուրդը, Ձեր գլխավորությամբ, պատերազմի առաջին իսկ ժամերից մինչև վերջին րոպեները աջակցեց մեզ։ Եվ այսօր Ղարաբաղի և Արևելյան Զանգեզուրի շրջանների վերականգնման և վերակառուցման գործում Ադրբեջանին կրկին ամենից շատ աջակցում է եղբայրական Թուրքիան։ Օրեր առաջ Ադրբեջան կատարած Ձեր այցի շրջանակներում մեր համատեղ մասնակցությունը Զանգիլան միջազգային օդանավակայանի, «Dost ագրոպարկի» խելացի գյուղատնտեսական համալիրի բացմանը, մի շարք կարևոր ենթակառուցվածքային նախագծերի հիմնարկեքի արարողությանը մեր եղբայրական հարաբերությունների վառ արտահայտությունն են:

Մեզ շատ է ուրախացնում, որ մեր կապերը, որոնք Շուշայի հռչակագրի ստորագրմամբ հասել են դաշնակցային մակարդակի, դրսևորվում են կյանքի բոլոր ոլորտներում՝ քաղաքական, տնտեսական, էներգետիկ, տրանսպորտային, մշակութային, կրթական, ռազմական և այլ ոլորտներում։ Վստահ եմ, որ մեր երկրների միջև դաշնակցային հարաբերությունները՝ առաջնորդվելով «Մեկ ազգ, երկու պետություն» կարգախոսով, մեր համատեղ ջանքերով կշարունակեն հաջողությամբ զարգանալ»։