Պետկոմիտեի ղեկավար. Ամեն ինչ պատրաստ է տրամվայները Բաքու վերադարձնելու համար
«Ինչպես գիտեք, Բաքվի Գլխավոր հատակագծի իրականացումը պահանջում է մեծ ներդրումներ՝ ինչպես պետական, այնպես էլ մասնավոր»։
Ինչպես հաղորդում է Caliber.Az-ը, այս մասին Բաքվի Գլխավոր հատակագծի շնորհանդեսին հայտարարել է՝ ԱՀ քաղաքաշինության և ճարտարապետության պետական կոմիտեի ղեկավար Անար Գուլիևը։
Նրա խոսքով, մայրաքաղաքի էկոլոգիայի պաշտպանության շրջանակներում հասարակական տրանսպորտի բոլոր տեսակների շարքում առաջին հերթին նախատեսվում է ուշադրություն դարձնել Բաքվի մետրոպոլիտենի զարգացմանը, նոր կայարանների կառուցմանը։ «Հետո գալիս են ավտոբուսները, որոնց անխափան տեղաշարժի համար կստեղծվեն էլ ավելի առանձնացված գոտիներ։ Ինչ վերաբերում է տրամվայներին, ապա ամեն ինչ պատրաստ է դրանց մայրաքաղաքի ճանապարհներ վերադառնալու համար։ Մասնավորապես, Գլխավոր հատակագիծը սահմանում է բոլոր փողոցները, որոնցով անցնելու է տրամվայը, բոլոր գոտիները, կանգառները և այլն»,- նշել է Ա. Գուլիևը։
Նա նաև ընդգծել է, որ մետրոյի դեպի Խըրդալան գծի կառուցումը, որը նշված է գլխավոր հատակագծում, չի իրականացվի, քանի որ Խըրդալանի մոտ արդեն կա մետրոյի «Խոջասան» կայարան։