Թուրքիան 100 հազար տնկի է ուղարկել Ադրբեջան՝ Ղարաբաղում և Բաքվում տնկելու համար

Թուրքիայի մի շարք շրջաններից Ադրբեջան է ուղարկվել 100 հազար ծառի տնկի։

Այս մասին հայտնում է Report-ը՝ հղում անելով Թուրքիայի գյուղատնտեսության և անտառային տնտեսության նախարարության անտառտնտեսության գլխավոր տնօրինությանը։

Հաղորդագրությունում նշվում է, որ անտառային տնտեսության ոլորտում համատեղ աշխատանքը ավելի կամրապնդի Ադրբեջանի և Թուրքիայի միջև ամուր համագործակցությունը։

«Քաղաքական, տնտեսական և ռազմական հարցերում Ադրբեջանի հետ համագործակցության հետ մեկտեղ՝ անտառտնտեսության ոլորտում նույնպես հաջողված նախագծեր են իրականացվում։ Այդ կապակցությամբ Ադրբեջան է ուղարկվել՝ Էսքիշեհիրի, Կոնիայի, Մերսինի, Ուրֆայի և Սաքարիայի շրջանային վարչությունների տնկարաններում աճեցված տարբեր սորտերի 100 հազար տնկիներ, այդ թվում՝ շոտլանդական սոճու, դափնու և ակացիայի։ Տնկիները նախատեսվում է տնկել Ղարաբաղում և Բաքվում»,- ընդգծվում է հաղորդագրության մեջ։