Ադրբեջանցի պրոֆեսորը՝ Կասպից ծովի աղետալի ծանծաղացման մասին Ե՞րբ կծագի հույսը. ՄԱՆՐԱՄԱՍՆԵՐ

«Կասպից ծովի մակարդակի արագ անկման հիմնական պատճառը Վոլգա գետից եկող ջրի ծավալի զգալի նվազումն է, ինչպես նաև գլոբալ տաքացման պատճառով արագացված գոլորշիացումը»։

Ինչպես հաղորդում է Caliber.Az-ը, այս մասին «Report»-ին տված հարցազրույցում հայտարարել է աշխարհագրական գիտությունների դոկտոր, պրոֆեսոր Ամիր Ալիևը, որը ղեկավարում է ակադեմիկոս Հասան Ալիևի անվան Աշխարհագրության ինստիտուտի Կասպից ծովի ափամերձ և հատակային գեոմորֆոլոգիայի բաժինը։

Մեկնաբանելով տարածված կարծիքը, որ Վոլգայի ամբարտակի կասկադի կառուցումը Կասպից ծովի ծանծաղացման հիմնական պատճառն է, գիտնականը հայտնել է, որ համաձայն չէ այս տեսակետի հետ։

«Ես կարծում եմ, որ հիդրոտեխնիկական կառույցները էական ազդեցություն չունեն այս գործընթացի վրա։ Վոլգայի վրա ամբարտակներ գոյություն են ունեցել այն ժամանակահատվածներում, երբ Կասպից ծովի մակարդակը և՛ բարձրացել է, և՛ իջել», - ընդգծել է պրոֆեսորը։