Ադրբեջանում հիմնական կապիտալում ներդրումները նվազել են

Ադրբեջանում 2024 թվականի հունվար-սեպտեմբերին հիմնական կապիտալում ներդրումների ծավալը կազմել է 12 մլրդ 711,1 մլն մանաթ, ինչը 3,9%-ով պակաս է նախորդ տարվա նույն ժամանակահատվածի համեմատ։

Ինչպես հայտնում է Caliber.Az-ը, այս մասին տեղեկացնում է Պետական վիճակագրական կոմիտեն: Այս տարվա 9 ամիսների ընթացքում նավթագազային հատվածում ներդրումների ծավալը նվազել է 8,4%-ով, ոչ նավթագազային հատվածում՝ 1,6%-ով:

Օգտագործված ներդրումների ընդհանուր ծավալից 6 մլրդ 302 մլն մանաթը կամ 49,6%-ը բաժին է ընկել արտադրության ոլորտներին, 4 մլրդ 743,8 մլն մանաթը (37,3%)՝ սպասարկման ոլորտներին, 1 մլրդ 665,3 մլն մանաթը (13,1%)՝ բնակելի շենքերի շինարարությանը։