Ադրբեջանում կարող են արգելել 60 Վտ և ավելի հզորությամբ շիկացման լամպերի ներմուծումն ու վաճառքը

2026 թվականից Ադրբեջանում կարգելվի 60 Վտ և ավելի հզորությամբ շիկացման լամպերի ներմուծումը, արտադրությունն ու վաճառքը։

Ինչպես հայտնում է Сaliber.Az-ը, Միլլի Մեջլիսի լիագումար նիստում առաջին ընթերցմամբ ընդունվել են «Էներգառեսուրսների արդյունավետ օգտագործման և էներգաարդյունավետության մասին» օրենքում համապատասխան փոփոխությունները։

Օրինագծի համաձայն՝ 2026 թվականի հունվարի 1-ից արգելվում է 60 Վտ և ավելի հզորությամբ շիկացման լամպերի ներմուծումը, արտադրությունը և վաճառքը, իսկ 2026 թվականի հուլիսի 1-ից՝ 25 Վտ-ից մինչև 60 Վտ հզորություն։

Արգելքը խախտելու դեպքում պաշտոնյաները կտուգանվեն 1000-1500 մանաթի չափով, իսկ իրավաբանական անձանց համար նախատեսված տուգանքի չափը կազմում է 3000-4000 մանաթ։

Կրկնակի խախտման դեպքում պաշտոնյաներին սպառնում է 1500-ից 2000 մանաթի տուգանք, իսկ իրավաբանական անձանց՝ 4000-ից 5000 մանաթի չափով։

Բոլոր դեպքերում նախատեսված է շիկացման լամպերի առգրավում։