Ադրբեջանում ռազմական քոլեջի կուրսանտներին կշնորհվի միչմանի կոչում

Ադրբեջանի Նախարարների կաբինետը փոփոխություն է մտցրել 2024 թվականի մայիսի 22-ի «Պաշտպանության նախարարության կառուցվածքի մաս կազմող Պաշտպանության ազգային համալսարանին առընթեր Բաքվի ռազմական քոլեջ, Գյանջայի ռազմական քոլեջ և Նախչըվանի ռազմական քոլեջ ստեղծելու մասին» որոշման մեջ։

Ինչպես հայտնում է Caliber.Az-ը, համապատասխան որոշումը ստորագրել է վարչապետ Ալի Ասադովը։

Որոշման համաձայն՝ վերոնշյալ ռազմական ուսումնարաններում միջին մասնագիտական կրթություն ստացած կուրսանտներին պաշտպանության նախարարի հրամանով այսուհետ, բացի ենթասպայի կոչումից, շնորհվելու է նաև միչմանի կոչում։ Սրա հետ կապված բոլոր երեք քոլեջների կանոնադրություններում կատարվել են համապատասխան փոփոխություններ։