Ալի Ասադով. Ադրբեջանում մշակվում է արհեստական բանականության ռազմավարություն

Ադրբեջանում ներկայումս մշակվում է արհեստական բանականության (ԱԲ) ռազմավարություն, ընդ որում՝ հատուկ նշանակություն է տրվում առաջնահերթ ոլորտների որոշմանը, որտեղ ԱԲ տեխնոլոգիայի ներդրումը կարող է զգալիորեն բարելավել դրանց արդյունավետությունը:

Ինչպես հայտնում է Caliber.Az-ը, այս մասին հայտարարել է Ադրբեջանի վարչապետ Ալի Ասադովը՝ հունվարի 31-ին ելույթ ունենալով Digital Almaty թվային միջազգային ֆորումի լիագումար նիստում։

«Մենք մշակում ենք Ադրբեջանի արհեստական բանականության ռազմավարությունը։ Հատուկ նշանակություն ենք տալիս առաջնահերթ ոլորտների որոշմանը, որտեղ ԱԲ տեխնոլոգիայի ներդրումը կարող է զգալիորեն բարձրացնել արդյունավետությունը: Դրանք են, առաջին հերթին, առողջապահությունը, տրանսպորտը և կրթությունը։ Մենք հատուկ ուշադրություն ենք դարձնում նաև ժամանակակից և ճկուն օրենսդրության մշակմանը և ներդրմանը [այս ոլորտում]», - ասել է վարչապետը։

Նրա խոսքով, մասնավորապես, իրավական հիմք է ստեղծվել թվային ֆորմատով մի շարք փաստաթղթերի օգտագործման համար։