Ալիևն ու Ֆայոնը քննարկել են Միջին միջանցքը

Ապրիլի 17-ին Ադրբեջանի նախագահ Իլհամ Ալիևն ընդունել է Սլովենիայի փոխվարչապետ և արտաքին գործերի նախարար Տանյա Ֆայոնին։

Ինչպես հայտնում է Caliber.Az-ը, այս մասին տեղեկությունը զետեղված է պետության ղեկավարի պաշտոնական կայքում։

Հանդիպմանը գոհունակություն է արտահայտվել Ադրբեջանի և Սլովենիայի միջև քաղաքական հարաբերությունների զարգացումից, նշվել է արտգործնախարարների մակարդակով վերջին քաղաքական խորհրդակցությունների կարևորությունը։ Իլհամ Ալիևը հայտարարել է, որ Ադրբեջանը մեծ նշանակություն է տալիս բալկանյան երկրների հետ հարաբերությունների զարգացմանը։

Զրույցի ընթացքում անդրադարձ է եղել էներգետիկ ոլորտում համագործակցությանը Բալկանյան տարածաշրջանի, այդ թվում՝ Սլովենիայի հետ, մտքերի փոխանակություն է տեղի ունեցել այս ոլորտում հեռանկարների շուրջ։ Ընդգծվել է երկու երկրների գործարար շրջանակների միջև կապերի զարգացման կարևորությունը՝ առևտրատնտեսական հարաբերությունների ընդլայնման համար։

Հանդիպմանը կողմերը նշել են Միջին միջանցքի կարևորությունը, ընդգծել, որ այս միջանցքը Եվրոպայի և Չինաստանի միջև առևտրատնտեսական հարաբերությունների զարգացման առանցքային տրանսպորտային զարկերակներից մեկն է, և որ այն նոր բարենպաստ հնարավորություններ է բացում սլովենական ընկերությունների համար։