Ալիևն ընդունել է Սլովակիայի փոխվարչապետի գլխավորած պատվիրակությանը

Նոյեմբերի 7-ին Ադրբեջանի նախագահ Իլհամ Ալիևն ընդունել է Սլովակիայի փոխվարչապետ, պաշտպանության նախարար Ռոբերտ Կալինյակի գլխավորած պատվիրակությանը։

Caliber.Az-ի փոխանցմամբ՝ այս մասին տեղեկատվությունը զետեղված է պետության ղեկավարի պաշտոնական կայքում։

Ռոբերտ Կալինյակը շնորհավորել է Իլհամ Ալիևին Հայրենական պատերազմում Հաղթանակի հինգերորդ տարեդարձի կապակցությամբ և շնորհակալություն հայտնել այդ իրադարձությանը նվիրված զորահանդեսին մասնակցելու հրավերի համար։ Հյուրը նաև նախագահին է փոխանցել Սլովակիայի վարչապետ Ռոբերտ Ֆիցոյի ողջույնը։

Իլհամ Ալիևը շնորհակալություն է հայտնել ողջույնի համար և իր ողջույնը փոխանցել Սլովակիայի վարչապետին։ Նախագահը բարձր է գնահատել Ռոբերտ Կալինյակի գլխավորած պատվիրակության մասնակցությունը Հայրենական պատերազմում Հաղթանակի հինգերորդ տարեդարձի առթիվ վաղը Բաքվում կայանալիք զորահանդեսին:

Նախարարը շնորհավորել է Իլհամ Ալիևին Ադրբեջանի և Հայաստանի միջև հարաբերությունների կարգավորման և խաղաղության օրակարգի առաջխաղացման գործում Վաշինգտոնում ձեռք բերված առաջընթացի համար։ Պետության ղեկավարը նշել է ԱՄՆ նախագահի մասնակցությամբ ստորագրված փաստաթղթերի պատմական նշանակությունը խաղաղության օրակարգի առաջխաղացման առումով և ընդգծել դրանց դերը տարածաշրջանում կայուն խաղաղության ապահովման գործում։

Ռոբերտ Կալինյակը նշել է, որ Սլովակիան անհամբեր սպասում է Իլհամ Ալիևի այցին: