Ալիևը Ռուսաստանից Բաքու է վերադարձել Ակտաուում տեղի ունեցած ավիավթարի պատճառով

Ադրբեջանի Հանրապետության նախագահ Իլհամ Ալիևին տեղափոխող ինքնաթիռը վայրէջք է կատարել՝ Բաքվի Հեյդար Ալիևի անվան միջազգային օդանավակայանում։

Ինչպես հայտնում է Caliber.Az-ը, այս մասին տեղեկություն է հրապարակվել ԱՀ ղեկավարի պաշտոնական կայքում։

Սանկտ Պետերբուրգում ԱՊՀ պետությունների ղեկավարների ոչ պաշտոնական գագաթնաժողովին մասնակցելու համար Ռուսաստան մեկնող  Իլհամ Ալիևը՝ տեղեկանալով AZAL ինքնաթիռի կործանման մասին, անհապաղ Ադրբեջան վերադառնալու մասին հանձնարարություն է տվել:

13:38

Նախագահ Իլհամ Ալիևը, ով մեկնել էր Ռուսաստանի Դաշնություն՝ մասնակցելու այսօր Սանկտ Պետերբուրգում անցկացվելիք ԱՊՀ անդամ պետությունների ղեկավարների ոչ պաշտոնական գագաթնաժողովին, ավիավթարի մասին տեղեկացվել է Ռուսաստանի Դաշնության օդային տարածքում գտնվելու ժամանակ և հանձնարարել է անհապաղ հետ վերադառնալ։

Ինչպես տեղեկացնում է Azertac-ը, ինքնաթիռում գտնվելու ժամանակ պետության ղեկավարը համապատասխան պետական կառույցներին անհրաժեշտ հանձնարարականներ է տվել՝ հետաքննելու վթարի պատճառները և անհապաղ միջոցներ ձեռնարկելու համար։

Ավիավթարի հետ կապված հարցերը գտնվում են պետության ղեկավարի վերահսկողության տակ։