ԲՆԽ զեկույցը. Ֆրանսիայի գաղութատիրական քաղաքականությունը հանգեցնում է անդրծովյան տարածքների դեգրադացման

Բաքվի նախաձեռնող խումբը (ԲՆԽ) պատրաստել է «Գողացված բարգավաճում. ինչպես գաղութատիրությունը ճնշեց տնտեսական ազատությունը անդրծովյան տարածքներում» խորագրով զեկույց, որում մանրամասն վերլուծվում է Ֆրանսիայի գաղութատիրական քաղաքականության բացասական ազդեցությունն իր անդրծովյան տարածքների վրա։

Ինչպես հայտնում է Caliber.Az-ը, զեկույցում նշվում է, թե ինչպես են բնական ռեսուրսները ոչնչացվում և շահագործվում Ֆրանսիայի այս շրջաններում։ Մասնավորապես, ընդգծվում է, որ ապօրինի անտառահատումները, ջրի աղտոտումը և բազմաթիվ այլ բնապահպանական հանցագործություններ, որոնք կատարվել են ֆրանսիական իշխանությունների թողտվությամբ, նպաստում են անդրծովյան տարածքների շրջակա միջավայրի դեգրադացմանը:

Զեկույցի հեղինակներն ընդգծում են, որ այս գործողությունները լուրջ տնտեսական և սոցիալական հետևանքներ ունեն անդրծովյան տարածքների համար. վնասում են խոցելի խմբերին, ոտնահարում են բնիկ ժողովուրդների իրավունքները և նպաստում կենսաբազմազանության կորստին։

Բացի այդ, Ֆրանսիայի գաղութային քաղաքականությունը ջնջում է մշակութային ինքնությունը և նպաստում անդրծովյան տարածքների բնիկ բնակչության կրճատմանը։

Զեկույցում շեշտվում է, որ կայուն և արդար ապագայի հասնելու համար պետք է վերացվեն գաղութատիրության բոլոր ձևերը, ներառյալ դրա ժամանակակից դրսևորումները, ինչպիսին է նեոգաղութատիրությունը:

«Ինչ վերաբերում է ժողովրդագրական իրավիճակին, ապա անդրծովյան շրջաններում բնակչության թվաքանակի նվազումը և մի շարք տեղերում ծնելիության անկումը վկայում են ապագայում մարդկային կապիտալի հնարավոր կորստի և արտասահմանյան տրանսֆերտներից կախվածության շարունակականության մասին», - նշվում է փաստաթղթում։