EPF. Հայաստանից ծանր մետաղներ պարունակող թափոնները թափվում են անդրսահմանային գետեր. սա անընդունելի է

Բնապահպանական ոչ կառավարական կազմակերպությունների «Environmental Protection First» (EPF) կոալիցիայի անդամները կոչ են արել կրկին ուշադրություն դարձնել իրենց ստեղծած ինտերակտիվ քարտեզին, որն արտացոլում է Հայաստանի հանքարդյունաբերական գործունեության արդյունքում Ադրբեջանով հոսող անդրսահմանային գետերին հասցված բնապահպանական վնասը:

Caliber.Az-ի փոխանցմամբ' աֆրիկյան երկրների մի շարք ոչ կառավարական կազմակերպությունների ղեկավարներ, բնապահպան ակտիվիստներ և լրագրողներ ևս մեկ անգամ դիմել են միջազգային կազմակերպություններին և բնապահպանական կոնվենցիաների քարտուղարություններին՝ կոչ անելով օգնել լուծել այս խնդիրը։ Այս կապակցությամբ մտահոգություն են հայտնում ոչ միայն Ադրբեջանի, այլև հենց Հայաստանի քաղաքացիական հասարակության ներկայացուցիչները։

Դիմումներն ուղարկվել են Շրջակա միջավայրի վրա ազդեցության գնահատման ՄԱԿ-ի կոնվենցիայի և Արդյունահանող ճյուղերի թափանցիկության նախաձեռնությանը (EITI)՝ Հարավային Կովկասի տարածաշրջանում շրջակա միջավայրի պաշտպանության համատեքստում:

ASRAD ՈԿԿ-ի (Մալի) ներկայացուցիչ Քաբինե Դումբիայի խոսքով, քարտեզը հստակ ցույց է տալիս, որ Հայաստանում հանքարդյունաբերական ձեռնարկությունների գործունեության արդյունքում առաջացած ծանր մետաղներ պարունակող թափոնները թափվում են անդրսահմանային գետեր:

«Կոչ ենք անում միջազգային կառույցներին Հայաստանի արդյունահանող արդյունաբերության թափանցիկությունը գնահատելիս հաշվի առնել բնապահպանական այս լուրջ խախտումները, որոնք չեն համապատասխանում շրջակա միջավայրի պահպանության սկզբունքներին», - ասել է DA News Media բնապահպանական պարբերականի հիմնադիրը։