Հայերն ու ադրբեջանցիները Բաքվում «Խաղաղության կամուրջ» են ստեղծում

«Խաղաղության կամուրջ» նախաձեռնության շրջանակներում, 2025-ի նոյեմբերի 21-22-ը Հայաստանի քաղաքացիական հասարակության ներկայացուցիչների խումբն այցելել է Ադրբեջան, հաղորդում է Caliber.Az-ը։

Նախաձեռնության Հայաստանի ներկայացուցիչները՝ Արեգ Քոչինյանը, Բորիս Նավասարդյանը, Նաիրա Սուլթանյանը, Նարեկ Մինասյանը և Սամվել Մելիքսեթյանը, հանդիպել են իրենց ադրբեջանցի գործընկերների՝ Ֆարհադ Մամեդովի, Ռուսիֆ Հուսեյնովի, Քյամալա Մամեդովայի, Ռամիլ Իսկանդերլիի և Ֆուադ Աբդուլլաևի հետ։

Հանդիպման ընթացքում քննարկումներ են ծավալվել Ադրբեջանի և Հայաստանի միջև խաղաղության գործընթացի դինամիկայի, երկխոսության խթանման գործում քաղաքացիական հասարակության դերի և մոտ ապագայում իրականացվելիք համատեղ նախագծերի վերաբերյալ։ Նրանք նաև քննարկել են ադրբեջանցի և հայ հասարակություններին հետաքրքրող արդիական հարցեր՝ կապված խաղաղության գործընթացի հետ։

Պայմանավորվածություն է ձեռք բերվել ակտիվացնել համատեղ գործունեությունը լրատվական դաշտում, հաստատել ուղիղ շփումներ փորձագիտական խմբերի միջև և հետագայում ներգրավել Ադրբեջանի և Հայաստանի քաղաքացիական հասարակություններին խաղաղության գործընթացում։

Համաձայնություն է ձեռք բերվել շարունակել աշխատանքային մակարդակով շփումները և պլանավորել ապագա այցելություններ Ադրբեջան և Հայաստան՝ «Խաղաղության կամուրջ» նախաձեռնության շրջանակներում։

Այցի ընթացքում «Խաղաղության կամուրջ» նախաձեռնության անդամները հանդիպել են Ադրբեջանի նախագահի օգնական, նախագահի աշխատակազմի արտաքին քաղաքականության վարչության ղեկավար Հիքմեթ Հաջիևի հետ։ Զրույցի ընթացքում քննարկվել են Վաշինգտոնի գագաթնաժողովից հետո Ադրբեջանի և Հայաստանի կողմից խաղաղության օրակարգը ամրապնդելու ուղղությամբ ձեռնարկված քայլերը։ Հիքմեթ Հաջիևը պատասխանել է նախաձեռնության ներկայացուցիչների հարցերին։