IAP-ի գործարկումը Ադրբեջանին թույլ կտա գազ մատակարարել բալկանյան 3 երկրներ Ալիևի հայտարարությունը միջազգային ֆորումում

Հոնիական-Ադրիատիկ գազատարի (IAP) գործարկումը Ադրբեջանին թույլ կտա գազ մատակարարել բալկանյան երեք երկրներ, հայտարարել է Ադրբեջանի նախագահ Իլհամ Ալիևը։

«Ուկրաինա-ռուսական պատերազմի սկսվելուց հետո բնական գազի հարցը դարձավ եվրոպական օրակարգի գլխավոր հարցերից մեկը։ Կան բազմաթիվ նախագծեր, որոնցից մեկը Հունաստան-Բուլղարիա ինտերկոնեկտորն է։ Նմանատիպ մեկ այլ նախագիծ է Հոնիական-Ադրիատիկ գազատարը (IAP): Այս խողովակաշարով ադրբեջանական գազը կմատակարարվի բալկանյան երեք երկրներ»,- ասել է Ալիևը՝ ուրբաթ օրը ելույթ ունենալով Իտալիայում անցկացվող Չերնոբբիո միջազգային 48-րդ ֆորումում, հաղորդում է «Ինտերֆաքս-Ադրբեջանը»:

Ալիևը հավելել է, որ վերջերս Ադրբեջանը պաշտոնական հարցումներ է ստացել ավելի քան 10 երկրներից՝ Վրաստանից, Թուրքիայից, Իտալիայից, Բուլղարիայից և այլ երկրներից՝ կամ գազի մատակարարումների ծավալն ավելացնելու, կամ էլ մատակարարում սկսելու հետ կապված։