«Ֆորմուլա-1»-ի Ադրբեջանի Գրան պրի. Բաքուն սպասում է հազարավոր զբոսաշրջիկների

«Ֆորմուլա-1»-ի Ադրբեջանի Գրան պրիի ժամանակ Բաքու կժամանի ավելի քան 12 հազար օտարերկրյա զբոսաշրջիկ։
 
Ինչպես հաղորդում է Report-ը, այս մասին հայտնել են Baku City Circuit ընկերությունում։
 
Կազմակերպիչների տվյալներով՝ անցյալ տարի  փուլի հանդիսատեսի ավելի քան 80%-ը օտարերկրացիներ էին։ Շատերը մայրաքաղաք էին ժամանել նույնիսկ առանց տոմսերի՝ պարզապես մրցավազքի մթնոլորտը զգալու համար։
 
«Ֆորմուլա-1»-ի վիճակագրության համաձայն՝ երկրպագուների 55%-ը պատրաստ է ադրբեջանական փուլը խորհուրդ տալ ընկերներին, իսկ 72%-ը պլանավորում է վերադառնալ հաջորդ երկու տարիների ընթացքում։
 
Մեկ օտարերկրյա հյուրի միջին ծախսերը կազմում են մոտ 2200 դոլար, ինչը Գրան պրին դարձնում է երկրում զբոսաշրջության և բիզնեսի զարգացման գործոն։ 2024 թվականին Բաքվի մրցավազքի հեռարձակումները հավաքել են 86 միլիոն հեռուստադիտող, իսկ մրցույթով հետաքրքրված մարդկանց ընդհանուր թիվը տարբեր հարթակներում գերազանցել է 3.9 միլիարդ հեռուստադիտողի սահմանը։
 
Հաշվի առնելով այս տարի Ադրբեջանի Գրան պրիի նկատմամբ բարձր հետաքրքրությունը՝ կառուցվել են երկու նոր տրիբունաներ։ 12 տրիբունաներից 10-ը արդեն ամբողջությամբ վաճառվել են, ընդհանուր տարողունակությունը կգերազանցի 20 հազար նստատեղը։