ԿԽՄԿ-ն այցելել է Ադրբեջանում պատերազմական հանցագործությունների մեջ մեղադրվող հայազգի անձանց

Հունիսին Կարմիր Խաչի Միջազգային Կոմիտեն (ԿԽՄԿ) կրկին այցելել է՝ Ադրբեջանում պատերազմական հանցագործությունների մեջ մեղադրվող հայկական ծագում ունեցող անձանց։
 
Ինչպես հաղորդում է Report-ը, այս մասին հայտնել է՝ Ադրբեջանում Կարմիր Խաչի Միջազգային Կոմիտեի ներկայացուցչության հասարակայնության հետ կապերի բաժնի ղեկավար Իլահա Հուսեյնովան։
 
Նշվում է, որ կալանավորվածների հետ անցկացվել են անհատական ​​հանդիպումներ, ստեղծվել են պայմաններ նրանց ընտանիքների հետ կապվելու համար, և նրանք ստացել են ծանրոցներ իրենց ընտանիքներից։
 
«ԿԽՄԿ-ի մանդատի համաձայն, նման այցելությունները ներառում են կալանավորված անձանց  նկատմամբ վերաբերմունքի և կալանքի պայմանների գնահատում: Կազմակերպությունը նաև պայմաններ է ստեղծում անհատների և նրանց ընտանիքների միջև կապերի վերականգնման կամ շարունակման համար: ԿԽՄԿ-ի ընթացակարգերի համաձայն, այցելություններին վերաբերող դիտարկումներն ու առաջարկությունները քննարկվում և փոխանցվում են միայն կալանավորող կողմին», - ընդգծվում է հաղորդագրության մեջ: