Ադրբեջանում նոր պահանջներ են սահմանվում լրատվական գործակալությունների համար

Միլլի Մեջլիսի արտահերթ նիստում երրորդ ընթերցմամբ ընդունվել է՝ «ԶԼՄ-ների մասին» օրենքում փոփոխությունների փաթեթը, որը նոր պահանջներ է սահմանում լրատվական գործակալությունների համար։

Ըստ Report-ի՝ փոփոխությունների համաձայն՝ գործակալությունը պետք է ունենա առնվազն 20 կնքված պայմանագիր այլ լրատվամիջոցների հետ՝ տեղեկատվություն տրամադրելու կամ ստանալու համար, ինչպես նաև հավատարմագրված լրագրողներ առնվազն հինգ օտարերկրյա պետություններում։
 
Բացի այդ, յուրաքանչյուր ամսվա 20 օրվա ընթացքում հրապարակված տեղեկատվության առնվազն 80%-ը պետք է համապատասխանի «ԶԼՄ-ների մասին» օրենքի 60.5-րդ հոդվածի պահանջներին։
 
Այս հոդվածի համաձայն, առցանց լրատվամիջոցների գործունեությունը համարվում է կանոնավոր, եթե ամսական 20 օրվա ընթացքում օրական հրապարակվում է առնվազն 20 տեղեկատվական նյութ։
 
Նաև սահմանվում է, որ լրատվամիջոցների գրանցամատյանում գրանցման բացակայության դեպքում տպագիր արտադրանքի թողարկումը կամ տարածումն արգելվում է ինչպես սուբյեկտի, այնպես էլ հրատարակչի կամ տարածողի կողմից։
 
Վերջնական ընթերցմամբ փոփոխությունները հաստատվել են ձայների մեծամասնությամբ։