COP29 կլիմայական գագաթնաժողովին ելույթ կունենան տասնյակ երկրների ղեկավարներ

Կլիմայի փոփոխության մասին ՄԱԿ-ի շրջանակային կոնվենցիայի մասնակից պետությունների 50 նախագահներ, 10 փոխնախագահներ, կառավարությունների 20 ղեկավարներ և երկու թագաժառանգները՝ նոյեմբերի 12-ից 13-ը պաշտոնական հայտարարություններով հանդես կգան՝  Կլիմայական գործողությունների համաշխարհային առաջնորդների գագաթնաժողովի բարձր մակարդակի սեգմենտում:
 
Ըստ Report-ի՝ այն կողմերը, որոնց պետությունների կամ կառավարությունների ղեկավարները այս ամսաթվերի վերաբերյալ ազգային հայտարարություններ չեն արել, կկարողանան դա անել բարձր մակարդակի վերսկսված  սեգմենտի ընթացքում, որը կանցկացվի նոյեմբերի 19-20-ը։
 
Գագաթնաժողովի առաջին օրը սպասվում են՝ Ղազախստանի նախագահ Կասըմ-Ժոմարտ Տոկաևի, Սերբիայի նախագահ Ալեքսանդր Վուչիչի, Թուրքիայի նախագահ Ռեջեփ Թայիբ Էրդողանի, Ուզբեկստանի նախագահ  Շավքաթ Միրզիյոևի, Լեհաստանի նախագահ Անջեյ Դուդայի, Ղրղզստանի նախագահ Սադըր Ժապարովի, Բելառուսի նախագահ Ալեքսանդր Լուկաշենկոյի, Բուլղարիայի նախագահ Ռումեն Ռադևի, Ֆինլանդիայի նախագահ Ալեքսանդր Ստուբի ու Եվրոպական խորհրդի  ղեկավար Շառլ Միշելի և Եվրոպական հանձնաժողովի նախագահ  Ուրսուլա ֆոն դեր Լեյենի և այլոց ելույթները։
 
Հայտարարություններով հանդես կգան նաև՝ Իսպանիայի վարչապետ Պեդրո Սանչեսը, Բելգիայի վարչապետ Ալեքսանդր Դե Կրոն և Մեծ Բրիտանիայի վարչապետ Կիր Սթարմերը, Գերմանիայի կանցլեր Օլաֆ Շոլցը և Սաուդյան Արաբիայի թագաժառանգ և վարչապետ Մուհամեդ բեն Սալման բեն Աբդուլազիզ Ալ Սաուդը։
 
Նոյեմբերի 13-ին կշարունակվեն պետությունների և կառավարությունների ղեկավարների ելույթները։ Ելույթ կունենան՝ Բոսնիա և Հերցեգովինայի նախագահության նախագահը, Մոնղոլիայի նախագահը, Բրազիլիայի, Տանզանիայի և Անգոլայի փոխնախագահները, Հունաստանի, Խորվաթիայի, Մալթայի, Իտալիայի, Վրաստանի, Հունգարիայի, Ալբանիայի, Պակիստանի, Ռուսաստանի, Նիդեռլանդների, Դանիայի վարչապետները, և այլոք: