Ադրբեջանում կարգելվի շիկացման լամպերի ներմուծումը, արտադրությունը և վաճառքը

Ադրբեջանի Միլլի Մեջլիսը՝ վերջնական ընթերցմամբ հաստատել է շիկացման լամպերի օգտագործման արգելքը։
 
Ինչպես հաղորդում է Report-ը, խորհրդարանի այսօրվա նիստում՝ խորհրդարանը երրորդ ընթերցմամբ հաստատել է՝ «Էներգետիկ ռեսուրսների արդյունավետ օգտագործման և էներգաարդյունավետության մասին» օրենքում փոփոխությունները։
 
Փոփոխությունների համաձայն, Ադրբեջանում արգելք է մտցվում՝ փոփոխական հոսանքի շղթաներում լուսավորության համար օգտագործվող շիկացման էլեկտրական լամպերի ներմուծման, արտադրության և վաճառքի վրա։ Բացառություն են կազմում արտադրական գործընթացներում և արտադրանքներում հատուկ օգտագործման համար նախատեսված շիկացման լամպերը, որոնց հիմնական նպատակը լուսավորությունը չէ։
 
Արգելքը ուժի մեջ կմտնի փուլ առ փուլ։ 2026 թվականի հունվարի 1-ից այն կկիրառվի 60 Վտ և ավելի հզորությամբ շիկացման լամպերի համար։ Եվ հուլիսի 1-ից կարգելվեն 25 Վտ (ներառյալ) մինչև 60 Վտ հզորությամբ լամպերը։