Ալիևը զանգահարել է Էրդողանին

Դեկտեմբերի 10-ին Ադրբեջանի նախագահ Իլհամ Ալիևը զանգահարել է՝ Թուրքիայի նախագահ Ռեջեփ Թայիբ Էրդողանին։
 
Ինչպես հաղորդում է Caliber.Az-ը, այս մասին տեղեկությունը տեղադրված է՝ Ադրբեջանի Հանրապետության ղեկավարի պաշտոնական կայքում։
 
Զրույցի ընթացքում պետությունների ղեկավարները ևս մեկ անգամ ընդգծել են, որ Ադրբեջանի և Թուրքիայի միջև եղբայրական և բարեկամական հարաբերությունները զարգանում են ռազմավարական դաշինքի հիման վրա։
 
Իլհամ Ալիևը գոհունակությամբ նշել է Ռեջեփ Թայիբ Էրդողանի և Ամինա Էրդողանի ակտիվ մասնակցությունը՝ Ադրբեջանում կայացած COP29 համաժողովի առաջնորդների գագաթնաժողովին և ընդգծել, որ թուրքական պատվիրակությունը նշանակալի ներդրում է ունեցել միջոցառման աշխատանքներում։
 
Ռեջեփ Թայիբ Էրդողանն իր հերթին շնորհավորել է Իլհամ Ալիևին՝ COP29-ի հաջող անցկացման և բանակցությունների ընթացքում ձեռք բերված արդյունքների կապակցությամբ։
 
Հեռախոսազրույցի ընթացքում շոշափվել են՝ Հարավային Կովկասի և Մերձավոր Արևելքի տարածաշրջանին վերաբերող հարցեր, մասնավորապես քննարկվել է՝ Սիրիայում Ասադի վարչակարգի տապալումից հետո ստեղծված իրավիճակը։
 
Պետությունների ղեկավարներն այս կապակցությամբ շնորհավորել են սիրիացի ժողովրդին և աջակցություն հայտնել՝ Սիրիայի տարածքային ամբողջականությանը և ինքնիշխանությանը։
 
Իլհամ Ալիևը հույս է հայտնել, որ այժմ Թուրքիայի աջակցությամբ Սիրիայում կսկսվի կայունության շրջան և հայտարարել, որ Ադրբեջանը եղբայրական Թուրքիայի հետ միասին պատրաստ է օգնել սիրիացի ժողովրդին՝ հումանիտար խնդիրների հաղթահարման հարցում։
 
Ռեջեփ Թայիբ Էրդողանն ընդգծել է, որ, ինչպես մյուս բոլոր ոլորտներում, Ադրբեջանն ու Թուրքիան միասին կաշխատեն՝ սիրիացի ժողովրդին մարդասիրական օգնության և աջակցության հարցում։
 
Զրույցի ընթացքում մտքերի փոխանակություն է տեղի ունեցել՝ Ադրբեջանի և Թուրքիայի միջև եղբայրական հարաբերությունների և ռազմավարական դաշինքի զարգացման հեռանկարների շուրջ։