Ադրբեջանը պահանջում է Հայաստանից պատժել «Ղարաբաղ» երգի գրագողության մեղավորներին

Ադրբեջանի մշակույթի նախարարությունը և Մտավոր սեփականության գործակալությունը համատեղ հայտարարություն են տարածել, որում պահանջում են Հայաստանի պաշտոնական կառույցներից պատասխանատվության ենթարկել ադրբեջանցի կոմպոզիտոր Բահրամ Նասիբովի «Ղարաբաղ» երգի հեղինակային իրավունքը խախտողներին։

Ինչպես հաղորդվում է Сaliber.Az-ը՝ վկայակոչելով հայտարարությանը, Հայաստանի համապատասխան կառույցներից պահանջվում է արգելել ադրբեջանցի կոմպոզիտոր Բահրամ Նասիբովի «Ղարաբաղ» ստեղծագործության մասսայական կատարումը և այն որպես հայկական «Սիրուն ջան» երգ ներկայացնելը, վերացնել գրագողության դեպքերը, վերականգնել Բահրամ Նասիբովի հեղինակային իրավունքները և պատասխանատվության ենթարկել խախտում կատարածներին՝ համաձայն միջազգային իրավունքի և ազգային օրենսդրության, ինչպես նաև տեղեկացնել ադրբեջանական կողմին ձեռնարկված միջոցների մասին։

«Հեղինակային իրավունքի խախտման այս փաստը չհետաքննվելու և չվերացնելու դեպքում Հայաստանի Հանրապետությունը կխախտի «ազգային ռեժիմի» սկզբունքը, որը Բեռնի «Գրական և գեղարվեստական ստեղծագործությունների պաշտպանության մասին» կոնվենցիայի 5-րդ հոդվածում ամրագրված հիմնարար սկզբունքներից է, որին անդամակցում է Հայաստանը, ինչպես նաև մի շարք այլ միջազգային պայմանագրերի դրույթներ»,- ասվում է հայտարարության մեջ։