Իլհամ Ալիև. «Հուսով եմ, որ հայկական կողմը քաղաքական կամք կցուցաբերի և խաղաղության պայմանագիր կկնքի»

Հուսով եմ, որ հայկական կողմը քաղաքական կամք կցուցաբերի և խաղաղության պայմանագիր կկնքի Ադրբեջանի հետ։

Ինչպես հաղորդում է Caliber.Az-ը, այս մասին հոկտեմբերի 24-ին Վրաստանի վարչապետ Իրակլի Ղարիբաշվիլիի հետ հանդիպման արդյունքներով հրավիրված մամուլի ասուլիսում ասել է Ադրբեջանի նախագահ Իլհամ Ալիևը։

«Ես վարչապետին տեղեկացրել եմ ղարաբաղյան երկրորդ պատերազմից հետո ստեղծված իրավիճակի մասին, Հայաստանի և Ադրբեջանի միջև խաղաղ բանակցությունների ընթացքի մասին։ Մենք կարծում ենք, որ ղարաբաղյան հակամարտության ավարտից հետո եկել է Ադրբեջանի և Հայաստանի միջև խաղաղության պայմանագրի ստորագրման ժամանակը։ Ամեն դեպքում, սա է մեր մտադրությունը։ Մենք հայկական կողմին ներկայացրել ենք հինգ հիմնական սկզբունքներից բաղկացած մեր առաջարկությունը։ Հուսով եմ, որ հայկական կողմը նույնպես քաղաքական կամք կցուցաբերի և խաղաղության պայմանագիր կկնքի Ադրբեջանի հետ։

Եթե դա տեղի ունենա, ապա Հարավային Կովկասում խաղաղություն կհաստատվի, ի հայտ կգան համագործակցության հնարավորություններ»,- ասել է պետության ղեկավարը։

Իլհամ Ալիևը հայտնել է նաև, որ այսօր Վրաստանում կայացած հանդիպման ժամանակ կողմերը մտքեր են փոխանակել վրաց-ադրբեջանա-հայկական խորհրդակցությունների մեկնարկի շուրջ։

«Այսօր զրույցի ընթացքում մենք մտքեր փոխանակեցինք վրաց-ադրբեջանա-հայկական խորհրդակցությունների մեկնարկի շուրջ։ Եթե հայկական կողմը պատրաստ է դրան, ապա մենք էլ ենք պատրաստ»,- նշել է պետության ղեկավարը։