Ղրղզստանն Ադրբեջանին է հանձնել հանցավոր խմբի կալանավորված անդամներին ԼՈՒՍԱՆԿԱՐ

Ղրղզստանի ազգային անվտանգության պետական կոմիտեի (ԱԱՊԿ) աշխատակիցները Ադրբեջանի ՆԳՆ ներկայացուցիչներին են հանձնել կազմակերպված հանցավոր խմբի հինգ անդամների, որոնք Բիշքեկ են ժամանել պատվերով սպանություն կատարելու համար և ձերբակալվել Ղրղզստանի մայրաքաղաքում։

Ինչպես հայտնում է Caliber.Az-ը՝ հղում անելով ղրղզական լրատվամիջոցներին, այս մասին հայտնում է Ազգային անվտանգության պետական կոմիտեի մամուլի կենտրոնը։

«Օպերատիվ-հետախուզական միջոցառումների ընթացքում պարզվել է, որ այդ անձինք իսկապես առնչություն ունեն հանցավոր խմբերի հետ։ Հաշվի առնելով այն հանգամանքը, որ այդ անձինք վտանգ են ներկայացնում Ղրղզստանի Հանրապետության քաղաքացիների համար, ինչպես նաև, Ադրբեջանի իրավապահ մարմինների հետ նախապես հաստատված համաձայնագրի համաձայն, ադրբեջանական կողմի հայցի հիման վրա Մանաս միջազգային օդանավակայանի (Բիշքեկ) տարածքում վերջիններս փոխանցվել են ԱՀ ՆԳՆ պաշտոնական ներկայացուցիչներին»,- ասվում է հաղորդագրության մեջ։

Ինչպես հիշեցրել են մամուլի կենտրոնում, Ադրբեջանի հինգ քաղաքացիներ մարտի 20-ին ժամանել են Ղրղզստան՝ նպատակ ունենալով «տարածել և ուժեղացնել իրենց հանցավոր ազդեցությունը», այդ թվում՝ «հանցավոր գաղափարախոսությունը, ինչպես նաև կատարել առանձնապես ծանր հանցագործություն՝ պատվերով սպանություն»։