Միրզոյան. Հայաստանն ուզում է օգտվել Ադրբեջանի երկաթգծերից

«Խաղաղությունը միայն կրակոցների բացակայությունը չէ: Դա նաև բաց սահմաններ են, ապրանքների ու մարդկանց տեղաշարժ։ Դժվար է խաղաղություն անվանել մի իրավիճակ, երբ Հայաստանը մնում է շրջափակման մեջ։ Ապաշրջափակումը նույնպես պետք է տեղի ունենա մի քանի սկզբունքներով, դրանք նույնպես հայտնի են՝ երկրների ինքնիշխանություն հաղորդակցությունների նկատմամբ, հավասարություն և փոխադարձություն։ Եթե Ադրբեջանը մուտք ունի դեպի հայկական հաղորդակցություններ և երկաթուղիներ, Հայաստանը նույնպես պետք է կարողանա օգտվել Ադրբեջանի երկաթգծերից»։

Ինչպես հայտնում է Caliber.Az-ը՝ հղում անելով հայկական ԶԼՄ-ներին, այս մասին հունվարի 10-ին Հունաստանի ԱԳՆ ղեկավարի հետ համատեղ ասուլիսում ասել է ՀՀ ԱԳՆ ղեկավար Արարատ Միրզոյանը։

Բանակցությունների վերաբերյալ նախարարը նշել է, որ դրանք մեծ հաշվով միշտ եղել են անմիջական։ Եղել են միջնորդներ, ովքեր աջակցել են կազմակերպմանը կամ փորձել են առաջարկներ ներկայացնել։

«Մենք շահագրգռված ենք շարունակել բանակցային գործընթացը։ Ակնկալում ենք, որ ապագայում Բաքուն այնուամենայնիվ կհամաձայնի շարունակել հանդիպումներն ու բանակցությունները»,- եզրափակել է նախարարը՝ նշելով այդ գործընթացին աջակցելու Հունաստանի առաջարկի կարևորությունը։