Ալիևը շնորհավորել է Թրամփին

Ադրբեջանի նախագահ Իլհամ Ալիևը նամակ է հղել ԱՄՆ նախագահ Դոնալդ Թրամփին։

Ինչպես հայտնում է Caliber.Az-ը, այս մասին տեղեկությունը զետեղված է ԱՀ ղեկավարի պաշտոնական կայքում։

Նամակում Իլհամ Ալիևը շնորհավորել է Դոնալդ Թրամփին նախագահի պաշտոնը ստանձնելու կապակցությամբ։ Իլհամ Ալիևը վստահություն է հայտնել, որ Դոնալդ Թրամփի հետագա գործունեությունը որպես ԱՄՆ 47-րդ նախագահ կարևոր դեր կխաղա համաշխարհային խաղաղության և միջազգային անվտանգության ամրապնդման գործում։ Իլհամ Ալիևը հիշեցրել է, որ Ադրբեջանը և ԱՄՆ-ը միշտ սերտորեն համագործակցել են համաշխարհային մարտահրավերների ու սպառնալիքների, միջազգային ահաբեկչության և դրա տարբեր դրսևորումների դեմ պայքարում։

Իլհամ Ալիևը հայտարարել է, որ Ադրբեջանը մտադիր է շարունակել ակտիվ և արդյունավետ աշխատանքը Միացյալ Նահանգների հետ համագործակցության ավանդական և նոր ոլորտներում, ինչպես նաև զարգացնել փոխադարձ վստահության վրա հիմնված երկկողմ գործընկերությունը։ Ադրբեջանի նախագահը վստահություն է հայտնել, որ Դոնալդ Թրամփի նախագահության օրոք Ադրբեջանի Հանրապետության և Ամերիկայի Միացյալ Նահանգների միջև բարեկամության և համագործակցության հարաբերություններն էլ ավելի կամրապնդվեն և կհամալրվեն նոր բովանդակությամբ։