Ադրբեջանի Գլխավոր դատախազության աշխատակիցները հետաքննություն են անցկացնում Գրոզնիում

Գրոզնիում են գտնվում Ադրբեջանի Գլխավոր դատախազության աշխատակիցները։

Այս մասին հայտնում է Caliber.Az-ը՝ հղում անելով ԱՀ Գլխավոր դատախազության մամուլի ծառայությանը։
 
ԱՀ նախագահ Իլհամ Ալիևի հանձնարարությամբ և կարգադրությամբ շարունակվում են անհետաձգելի և անհրաժեշտ միջոցառումները՝ Ղազախստանի Ակտաու քաղաքի մոտ մարդատար ինքնաթիռի կործանման դեպքի առթիվ հարուցված քրեական գործով օբյեկտիվ ճշմարտությունը պարզելու ուղղությամբ։
 
Այս միջոցառումների շրջանակում՝ Գլխավոր դատախազության մի խումբ աշխատակիցներ մեկնել են Գրոզնի։ Այնտեղ ՌԴ գլխավոր դատախազության գործընկերների հետ համատեղ՝ իրականացվում են քննչական և դատավարական գործողություններ։
 
Հիշեցնենք, որ դեկտեմբերի 25-ին՝ Ադրբեջանի Գլխավոր դատախազության աշխատակիցների մեկ այլ խումբ՝ գլխավոր դատախազի տեղակալ Էլմար Ջամալովի ղեկավարությամբ, մեկնել էր Ակտաու։ Նրանք ղազախ գործընկերների հետ շարունակում են աշխատել աղետի վայրում՝ իրականացնելով անհրաժեշտ գործողություններ։