Ալիևը՝ Ղարաբաղի համալսարանի ուսանողներին. Լավ սովորեք, որ Ադրբեջանը միշտ հաղթի

Սեպտեմբերի 20-ին Ադրբեջանի Հանրապետության նախագահ Իլհամ Ալիևը Խանքենդի քաղաքում մասնակցել է Ղարաբաղի համալսարանի հիմնանորոգումից հետո բացմանը։

AZERTAC-ի փոխանցմամբ՝ երկրի ղեկավարին զեկուցվել է բարձրագույն ուսումնական հաստատությունում ստեղծված պայմանների մասին։

Նախագահը հանդիպել է Ղարաբաղի համալսարանի ուսուցիչների և ուսանողների հետ և ելույթ է ունեցել միջոցառմանը։

«Կարծում եմ, որ Ղարաբաղի համալսարանի ստեղծումը պատմական իրադարձություն է, և համապատասխան հրամանագիրը ստորագրվել է անցյալ տարվա նոյեմբերին, այնուհետև ես այցելեցի այստեղ՝ սա իմ երրորդ ուղևորությունն է այստեղ, և տրվեցին բոլոր հանձնարարականները, գիտության և կրթության նախարարությունը ձեռնարկեց բոլոր անհրաժեշտ միջոցառումները: Կարելի է ասել, որ շենքը նորից է կառուցվել: Շենքը կառուցվել էր դեռևս խորհրդային տարիներին՝ ադրբեջանցի ճարտարապետների, շինարարների կողմից: Օկուպացիայի ժամանակ որոշակի աշխատանք էր կատարվել դրա հայկականացման համար: Այդ նշանները ամբողջությամբ վերացվել են:

Շենքի առաջ կառուցվել է գեղեցիկ պուրակ: Պատրաստվել է մաստեր-պլան, այսինքն՝ առաջիկա տարիներին կկառուցվեն կրթական նոր մասնաշենքեր:

Հրաշալի հանրակացարան է ստեղծվել։ Ամենակարևորը՝ երիտասարդները, այսինքն՝ ուսանողները, սկսեցին մեծ ոգևորությամբ գալ այստեղ։ Հիմա տեղեկացա, որ այստեղ 1200 ուսանող կա։ Այստեղ ուսանողներ կան մեր երկրի բոլոր մարզերից։ Այս հանդիպմանը մասնակցում են բարձր, այդ թվում՝ 600-ից ավելի միավոր վաստակած ուսանողները, ովքեր այստեղ են եկել մեծ ոգևորությամբ։ Ձևավորվել է նաև դասախոսական կազմը։

Սա մեր պատմական հողն է, և ես համոզված եմ, որ Ադրբեջանում դա գիտեն բոլորը։ Աշխարհում էլ գիտեն, որ Խանքենդի քաղաքը եղել է հնագույն ադրբեջանական բնակավայր, ինչի մասին է վկայում նրա անունը՝ Խանի գյուղ։ Պարզապես Ադրբեջանի և մեր ժողովրդի դեմ թշնամական քաղաքականության արդյունքում երկար տարիներ մեր վերահսկողությունն այստեղ կամ թույլ է եղել, կամ էլ ընդհանրապես բացակայել։ Որովհետև 19-րդ դարի սկզբին կնքված երեք պայմանագրերը՝ Քուրեքչայի, Գյուլիստանի և Թուրքմենչայի պայմանագրերը, փաստորեն, պայմանավորեցին նաև հետագա օկուպացիան։ Հենց այս պայմանագրերից հետո սկսվեց Իրանից և Արևելյան Անատոլիայից հայերի վերաբնակեցումը այստեղ, որոնք երբեք չէին ապրել ղարաբաղյան հողում:

Սա ճշմարտություն է, սա ճշգրիտ պատմություն է։ Ուղղակի Հայաստանն ու հայ գիտնականները, ինչպես միշտ, կեղծեցին պատմությունը, փորձեցին հորինված պատմություն ստեղծել և իրենց լոբբիստական ցանցերի միջոցով կարողացան որոշակիորեն մոլորեցնել միջազգային հանրությանը։

Ես կարող եմ շատ խոսել Ադրբեջանի պատմության մասին, քանի որ ես վերապրել եմ այս պատմությունը, վերջին 30 տարվա պատմությունը և լինել այսօր Ղարաբաղում, ազատ Ղարաբաղում, տեսնել ձեզ, տեսնել ուսանողների ժպտացող դեմքերը: Սա իսկապես մեծ երջանկություն է։ Երևի դրանից ավելի մեծ երջանկություն չի կարող լինել։ Հաջողություն եմ մաղթում դասախոսներին և աշակերտներին։ Լավ աշխատեք, լավ սովորեք, որ Ադրբեջանը միշտ հաղթի, որ անհրաժեշտության դեպքում թե՛ մարտի դաշտում, թե՛ տնտեսական ոլորտում, թե՛ քաղաքական դաշտում Ադրբեջանը միշտ լինի ամենուր բարձունքում»։

20-09-2024

10:09

Սեպտեմբերի 20-ին Ադրբեջանի նախագահ Իլհամ Ալիևը Խանքենդի քաղաքում մասնակցել է վերանորոգումից հետո Ղարաբաղի համալսարանի բացմանը։

Ինչպես հաղորդում է Caliber.Az-ը, այս մասին տեղեկությունը զետեղված է Ադրբեջանի Հանրապետության ղեկավարի պաշտոնական կայքում։

Այս րոպեներին Իլհամ Ալիևը հանդիպում է անցկացնում Ղարաբաղի համալսարանի դասախոսների և ուսանողների հետ։