Դատավարություն Բաքվի դատարանում. Վարդանյանին կպաշտպանի Բաբըշովը

Այսօր շարունակվել է՝ խաղաղության և մարդկության դեմ հանցագործությունների, պատերազմական հանցագործությունների, ահաբեկչության, ահաբեկչության ֆինանսավորման և այլ ծանր հանցագործությունների մեջ մեղադրվող Հայաստանի քաղաքացի Ռուբեն Վարդանյանի նկատմամբ քրեական դատավարությունը։
 
AZERTAC-ի փոխանցմամբ՝ Բաքվի ռազմական դատարանում դատավոր Զեյնալ Աղաևի նախագահությամբ և դատավորներ Անար Ռզաևի և Ջամալ Ռամազանովի (պահեստային դատավոր Գյունել Սամեդովա) կազմով անցկացված բաց նիստում մեղադրյալին տրամադրվել է թարգմանիչ նրա տիրապետած լեզվով՝ ռուսերենով։
 
Զեյնալ Աղաևը հիշեցրել է, որ նախորդ նիստում մեղադրյալ Ռուբեն Վարդանյանը միջնորդություն է ներկայացրել դատարան՝ հայտարարելով, որ հրաժարվում է իր փաստաբան Աբրահամ Բերմանից, քանի որ ընդհանուր առմամբ դժգոհ է դատավարությունից։
 
Ռուբեն Վարդանյանը նաև նշել է, որ նա պայմանագիր չունի մեկ այլ փաստաբանի հետ և նա դեմ չէ, որ պետությունը իրեն մեկ այլ պաշտպան նշանակի։ Դատարանը բավարարել է Ռուբեն Վարդանյանի միջնորդությունը՝ հրաժարվելու իր փաստաբան Աբրահամ Բերմանից, և մեղադրյալին պետության   կողմից պաշտպան տրամադրելու որոշումը ուղարկվել է Ադրբեջանի Հանրապետության փաստաբանների կոլեգիա։
 
Դատավորը հայտարարել է, որ Վարդանյանին պաշտպան է նշանակվել պետության կողմից։ Վարդանյանի նոր պաշտպանը՝ Փաստաբանների կոլեգիայի անդամ Էմիլ Բաբըշովն է։
 
Մեղադրյալը չի ​​առարկել նոր պաշտպանի նշանակմանը։
 
Դատավարության մյուս մասնակիցները նույնպես նշել են, որ նրանք առարկություններ չունեն։
 
Այնուհետև դատավոր Զեյնալ Աղաևը նորանշանակ փաստաբանին ծանոթաացրել է դատարանի կազմին և հայտնել, որ նրան հնարավորություն կտրվի հանդիպել մեղադրյալի հետ, ինչպես նախնական կալանքի կենտրոնում, այնպես էլ դատարանում, ինչպես նաև ծանոթանալ քրեական գործի նյութերին։
 
Դատական ​​նիստը կշարունակվի նոյեմբերի 4-ին։