Ադրբեջանի ԱԳՆ-ն՝ Էրիթրեայի ջրերում ադրբեջանական նավերի կալանման մասին

2024 թվականի նոյեմբերի 7-ին Caspian Marine Services B.V.-ի ադրբեջանական մասնաճյուղի կողմից շահագործվող և Ադրբեջանի պետական դրոշի ներքո նավարկող CMS Pəhləvan, CMS İgid և CMS-3 նավերը Սուեզի ջրանցքի ուղղությամբ դեպի Աբու Դաբի (Արաբական Միացյալ Էմիրություններ) շարժվելիս եղանակի վատթարացման պատճառով հարկադիր մուտք են գործել Էրիթրեայի Պետության տարածքային ջրեր:

Ինչպես հայտնում է Caliber.Az-ը, այս մասին հայտարարել է Ադրբեջանի արտաքին գործերի նախարարության մամուլի քարտուղար Այխան Հաջիզադեն։

Նրա խոսքով՝ այդ նավերը կալանվել են Էրիթրեայի համապատասխան գերատեսչության կողմից, ինչը այդ կառույցը հիմնավորել է իր տարածքային ջրերը չարտոնված հատումներով։ Այդ նավերի անձնակազմի 18 անդամները Ադրբեջանի Հանրապետության քաղաքացիներ են։

«Հենց որ Ադրբեջանի արտաքին գործերի նախարարությունը տեղեկություն ստացավ տեղի ունեցածի մասին, հարցը վերցվեց վերահսկողության տակ»,- ասել է Այխան Հաջիզադեն։