G20-ի առաջնորդները՝ COP29-ի մասնակիցներին. Բաքուն մի լքեք առանց նոր ֆինանսական նպատակի

G20-ի երկրների առաջնորդները հստակ ազդանշան են հղել COP29-ի բանակցողներին. Բաքուն մի լքեք առանց հավակնոտ նոր ֆինանսական նպատակի: Սա բխում է բոլոր երկրների շահերից։
 
Ինչպես հաղորդում է Caliber.Az-ը, այս մասին հայտարարել է՝ Կլիմայի փոփոխության մասին ՄԱԿ-ի շրջանակային կոնվենցիայի գործադիր քարտուղար Սայմոն Սթիլը։
 
Նա նշել է, որ աշխարհի խոշորագույն տնտեսությունների ղեկավարները նույնպես պարտավորվել են առաջ մղել ֆինանսական բարեփոխումները՝ որպեսզի  կլիմայի փոփոխության դեմ պայքարի   վճռական գործողությունները հասանելի լինեն բոլոր երկրներին. «Սա հույժ կարևոր ազդանշան է՝ պարտքային ճգնաժամով և կլիմայի փոփոխության արագացող ազդեցություններով տառապող աշխարհում, որոնք կործանում են մարդկանց կյանքը, խաթարում մատակարարման շղթաները և բարձրացնում են գնաճը բոլոր երկրներում:
 
Առաջնորդները վերահաստատել են, որ գլոբալ համագործակցությունը  հույժ կարևոր է, և որ COP29-ը պետք է օրինակ ցույց տա՝ համաձայնեցնելով հավակնոտ նոր ֆինանսական նպատակը՝ որպես որոշումների հավասարակշռված փաթեթի առանցքային կետ:
 
Ինչպես նշել են G20-ի առաջնորդները, նույնպես  անհրաժեշտ է մշակել ավելի հավակնոտ ազգային ծրագրեր կլիմայի փոփոխության դեմ պայքարելու համար, որպեսզի, արդեն հիմա   զգալիորեն արագացվի անցումը դեպի համաշխարհային տնտեսություն՝ հիմնված մաքուր էներգիայի օգտագործման և կլիմայի փոփոխության նկատմամբ կայունության վրա: