Թբիլիսին և Բաքուն պարզեցնում են սահմանային ընթացակարգերը Նոր նախագիծ

Վրաստանը աշխատում է Ադրբեջանի հետ համատեղ սահմանային անցակետեր ստեղծելու ուղղությամբ՝ «միասնական պատուհանի» հայեցակարգի շրջանակներում։
 
APA-ի տարածաշրջանային բյուրոյի հաղորդագրությամբ՝ այս մասին հայտարարել է Վրաստանի ֆինանսների նախարար Լաշա Խուցիշվիլին՝ Կենտրոնական Ասիայի և Կովկասի ֆինանսների նախարարների ու կենտրոնական բանկերի կառավարիչների հետ Վաշինգտոնում՝ Արժույթի միջազգային հիմնադրամի գլխավոր տնօրենի տեղակալ Բո Լիի հետ հանդիպման ժամանակ։
 
Խուցիշվիլիի խոսքով՝ նախագծի իրականացումը պահանջում է ընթացակարգերի պարզեցում և սահմանային ենթակառուցվածքների արդիականացում։ Նախարարը նշել է, որ Վրաստանը վերջին տարիներին կարևոր քայլեր է ձեռնարկել  պետական ծառայությունների թվայնացման, էլեկտրոնային հարկման ներդրման և մաքսային վերահսկողության արդյունավետության բարձրացման ուղղությամբ։
 
Նա նաև ընդգծել է՝ Ադրբեջանի, Թուրքիայի և Հայաստանի հետ սահմաններ տանող ավտոմայրուղիների վերջին հատվածների ավարտման կարևորությունը, ինչը կամրապնդի տրանսպորտային և տնտեսական կապերը։