Ադրբեջանը 2022-ին Իտալիա կմատակարարի մոտ 10 միլիարդ խորանարդ մետր գազ. Իլհամ Ալիև

Ադրբեջանը ծրագրում է 2022 թվականին Իտալիա արտահանել շուրջ 10 միլիարդ խորանարդ մետր գազ, հայտարարել է Ադրբեջանի նախագահ Իլհամ Ալիևը։

«Այս տարի մենք նախատեսում ենք ավելացնել գազի ծավալը և շուրջ 10 միլիարդ խորանարդ մետր գազ արտահանել իտալական շուկա»,- ասել է նախագահը՝ ուրբաթ օրը ելույթ ունենալով Իտալիայում անցկացվող Չերնոբբիո միջազգային 48-րդ ֆորումում, տեղեկացնում է «Ինտերֆաքս»-ը։

Ինչպես ավելի վաղ հաղորդվել էր, 2021 թվականին Ադրբեջանն Իտալիա մատակարարել է 6,8 միլիարդ խորանարդ մետր գազ։

Ալիևը, որի խոսքերը մեջբերում է պետության ղեկավարի կայքը, նշել է, որ Հարավային գազային միջանցքի (ՀԳՄ) գործարկումից ի վեր՝ 2020 թվականի դեկտեմբերի 31-ից, Ադրբեջանից Եվրոպա է արտահանվել 13,5 միլիարդ խորանարդ մետր գազ, որից 11,7 մլրդ խմ-ն՝ Իտալիա:

2021 թվականին Ադրբեջանը Եվրոպա է արտահանել 8,2 միլիարդ խորանարդ մետր գազ, 2022 թվականին մատակարարումների ծավալը կկազմի 12 միլիարդ խորանարդ մետր։ Ընդհանուր առմամբ, 2022 թվականին ադրբեջանական գազի արտահանման ծավալը կկազմի 24 միլիարդ խորանարդ մետր (2021 թվականին՝ 22 միլիարդ խորանարդ մետր)։