Ադրբեջանը COP29 կոնֆերանսում հրադադարի կոչ կանի աշխարհում

ՄԱԿ-ի կլիմայական COP29 կոնֆերանսում, որը կանցկացվի նոյեմբերի 11-22-ը Բաքվում, Ադրբեջանը՝ հրադադարի կոչ է անելու ամբողջ աշխարհում։

Ինչպես հաղորդում է Caliber.Az-ը՝ վկայակոչելով թուրքական ԶԼՄ-ներին, այս մասին հայտարարել է՝ Ադրբեջանի էներգետիկայի փոխնախարար Էլնուր Սոլթանովը։

«Կլիմայի և խաղաղության միջև փոխադարձ կապը նույնպես Ադրբեջանի առաջարկների թվում է։ COP29-ում մենք հրադադարի կոչ ենք անելու ամբողջ աշխարհում, ինչպես արեցինք Օլիմպիական խաղերում»,- ասել է փոխնախարարը։

Նրա խոսքով, համաժողովում քննարկվելիք կարևոր հարցերից մեկը՝ Փարիզի համաձայնագրի 6-րդ հոդվածով ածխածնի արտանետումների քվոտաների առևտրի խոչընդոտների վերացումն է։

Բացի այդ, նախատեսվում է քննարկել՝ կլիմայի ֆինանսավորման, էներգետիկայի, գյուղատնտեսության, ջրային ռեսուրսների, զբոսաշրջության, թվայնացման, կանաչ քաղաքների և մարդկային ռեսուրսների հարցեր։

Սոլթանովն ասել է, որ Ադրբեջանը COP29-ում կհյուրընկալի մոտ 80 հազար հյուրի։ Տարբեր օրերին տարբեր թվով հյուրեր կգան ու կլքեն երկիրը, պարզաբանել է նա։

«Մենք ունենք ենթակառուցվածք՝ օրական մոտ 40 հազար հյուր ընդունելու համար։ Հրավերներ են ուղարկվել աշխարհի բոլոր պետությունների ղեկավարներին։ Ավելի քան 50 պետությունների և կառավարությունների ղեկավարներ հաստատել են իրենց մասնակցությունը։ Ակնկալում ենք, որ այս թիվը կավելանա։ Հայաստանն էլ է հրավիրված»,- ընդգծել է նա։