Ադրբեջանից զբոսաշրջային հոսքը կրկնապատկվել է

Արտասահման մեկնող Ադրբեջանի քաղաքացիների ընդհանուր թիվը այս տարվա հունվար-հուլիսին՝ նախորդ տարվա նույն ժամանակահատվածի համեմատ կրկնապատկվել է և կազմել 829,4 հազար մարդ։

Այս մասին Caliber.Az-ին հայտնել են Պետական վիճակագրական կոմիտեում։

Ըստ տեղեկությունների՝ Իրան մեկնածների թիվն աճել է 4,3 անգամ, Թուրքիա՝ 2,2 անգամ, Վրաստան՝ 1,9 անգամ, Ռուսաստան՝ 23,2 անգամ։ Երկրի քաղաքացիների 47,9%-ն այցելել է Թուրքիա, 16,6%-ը՝ Ռուսաստան, 12,2%-ը՝ Իրան, 8,3%-ը՝ Վրաստան, 15%-ը՝ այլ երկրներ։

Մեկնածների 64,8%-ը տղամարդիկ են, 35,2%-ը՝ կանայք։

2022 թվականի հունվար-հուլիսին ճանապարհորդների 60,1%-ն օգտվել է օդային, 37,3%-ը՝ երկաթուղային և ավտոմոբիլային, 2,6%-ը՝ ծովային տրանսպորտից։