Ադրբեջանն ու Ղազախստանը քննարկել են համագործակցությունը հանքարդյունաբերական նախագծերում

Ադրբեջանի Պետնավթընկերության (SOCAR) նախագահ Ռովշան Նաջաֆը հանդիպել է Ադրբեջանում Ղազախստանի արտակարգ և լիազոր դեսպան Ալիմ Բայելի հետ։

Այս մասին, ըստ Report-ի, ասված է SOCAR-ի հաղորդագրության մեջ։

Հանդիպմանը գոհունակություն է հայտնվել Ադրբեջանի և Ղազախստանի միջև բոլոր ոլորտներում, այդ թվում՝ էներգետիկայի ոլորտում հաջող համագործակցության կապակցությամբ։ Այս առումով հատկապես նշվել են SOCAR-ի և ղազախական ընկերությունների միջև դինամիկ զարգացող հարաբերությունները։

Հանդիպման ընթացքում մտքերի փոխանակություն է տեղի ունեցել SOCAR-ի և KazMunayGas-ի միջև համագործակցության ներկա վիճակի, Ադրբեջանի տարածքով ղազախական նավթի տարանցման, արտադրական նախագծերում համագործակցության հնարավորությունների և փոխադարձ հետաքրքրություն ներկայացնող այլ հարցերի շուրջ։