Ադրբեջանում ձերբակալվել են Իրանի գործակալներ, որոնք զինված անկարգություններ էին ծրագրում ՊԱՇՏՈՆԱԿԱՆ/ՏԵՍԱՆՅՈՒԹ

Ադրբեջանի ՆԳՆ, Պետական անվտանգության ծառայության և Գլխավոր դատախազության աշխատակիցները համատեղ հատուկ համալիր միջոցառումներ են ձեռնարկել՝ կանխելու հանցանքները, որոնք պլանավորվում էին կատարել Իրանի Իսլամական Հանրապետության հատուկ ծառայությունների կողմից հավաքագրված անձինք՝ գումարի դիմաց:

Ինչպես հայտնում է Сaliber.Az-ը, այս մասին ասված է այդ պետական կառույցների համատեղ հայտարարության մեջ։

Պարզվել է, որ Իրանում բնակվող և իրանական հատուկ ծառայությունների հետ համագործակցող Ռուֆուլլա Ախունդզադեն և Բախտիյար Բայրամովը այդ համագործակցության մեջ են ներգրավել Թերթերի շրջանի բնակիչ Արիֆ Ջումշուդովին և հրահանգել ստեղծել «դիմադրության խումբ»՝ Ադրբեջանի տարածքում զինված անկարգություններ կազմակերպելու, սահմանադրական կարգը բռնի կերպով փոխելու և շարիաթի օրենքներով կառավարվող «Kərimə» պետություն ստեղծելու համար:

Արիֆ Ջումշուդովն այդ ծրագրում ներգրավել է իր ծանոթներին, որոնք քարոզում էին կրոնական արմատականություն՝ Թարզան Գարաշևին, Սանան Մամեդովին, Խագանի Մամեդովին և Իգբալ Ախունդովին։

Նա պարբերաբար գաղտնի հանդիպումներ է կազմակերպել իր տանը և Ռուֆուլլա Ախունդզադեի և Բախտիյար Բայրամովի ցուցումները փոխանցել վերը նշված անձանց։ Խմբի անդամներն իրենց հերթին փորձել են համագործակցության մեջ նոր մարդկանց ներգրավել և այս մասին տեղյակ են պահել Ախունդզադեին։

Այդ անձինք ներկայացել են որպես հավատացյալներ, սոցցանցերում և մարդաշատ վայրերում քարոզել են կրոնական արմատականություն, կատարել են Ադրբեջանում կրոնական հանդուրժողականության ավանդույթները խախտելու դրսից ստացված հրահանգները: