Թուրքիայի ԱԳՆ ղեկավար. Քըլըչդարօղլու, ի՞նչ եք ուզում Ադրբեջանից

Նույնիսկ Հայաստանի վարչապետ Նիկոլ Փաշինյանը հայտարարում է՝ Ադրբեջանի տարածքային ամբողջականությունը, այդ թվում Ղարաբաղի՝ ճանաչելու պատրաստակամության մասին։ Ի՞նչ խնդիր ունեք, Քըլըչդարօղլու։

Caliber.Az-ը հայտնում է, որ նման հռետորական հարց է տվել Թուրքիայի արտգործնախարար Մևլութ Չավուշօղլուն՝ ելույթ ունենալով Անթալիայում։

Նախարարը հիշեցրել է, որ երկրի նախագահի թեկնածուն (ընտրությունների երկրորդ փուլը տեղի կունենա մայիսի 28-ին - խմբ.), ընդդիմադիր Ժողովրդահանրապետական կուսակցության նախագահ Քեմալ Քըլըչդարօղլուն նախկինում ներկայացրել էր ինչ որ մի տրանսպորտային նախագիծ, որը շրջանցում էր Ադրբեջանը։

«Քըլըչդարօղլու, ի՞նչ եք ուզում Ադրբեջանից. Ի՞նչ խնդիր ունեք մեր ադրբեջանցի եղբայրների հետ։ Հնարավո՞ր է այլ բան սպասել նրանցից, ովքեր ասում էին, որ «ցավոք, Թուրքիան օգնեց Ադրբեջանին» ադրբեջանական հողերի օկուպացիայից ազատագրման հարցում: Ոչ, դա անհնար է»,- հայտարարել է Մ.Չավուշօղլուն։