Իլհամ Ալիևը դիմել է՝ ԱՊՀ անդամ երկրների գլխավոր դատախազների համակարգող խորհրդի նիստի մասնակիցներին

Նախագահ Իլհամ Ալիևը դիմել է՝ Անկախ Պետությունների Համագործակցության անդամ երկրների գլխավոր դատախազների համակարգող խորհրդի 33-րդ նիստի մասնակիցներին։

Ինչպես հայտնում է Caliber.Az-ը, դիմումում ասվում է.

«Որպես ԱՊՀ ակտիվ անդամ՝ Ադրբեջանը կարևոր է համարում այդ կազմակերպության հետագա ամրապնդմանն ուղղված ջանքերի ավելացումը։ Կարևոր է ԱՊՀ շրջանակներում անվտանգության և կայունության պաշտպանությունը և համագործակցության հետագա ամրապնդումը։

Հարգելի հյուրեր, օրենքի գերակայությունը, մարդու իրավունքների և ազատությունների պաշտպանությունը ցանկացած իրավական պետության բարձրագույն նպատակն է։ Այս տեսանկյունից դատախազությունը բացառիկ դեր է խաղում օրինականության ապահովման ու ամրապնդման, հանցավորության դեմ պայքարում։

Անդրազգային կազմակերպված հանցավորությունը լուրջ վտանգ է ներկայացնում յուրաքանչյուր պետության սոցիալական, տնտեսական և քաղաքական կայունության համար։ Այն ժամանակ, երբ ժամանակակից աշխարհում աճում են գլոբալ և տարածաշրջանային սպառնալիքները, ԱՊՀ անդամ երկրների դատախազները բախվում են նոր և բարդ մարտահրավերների։ Այս վտանգները պահանջում են միջազգային իրավունքի կիրարկման կարողությունների մեծացում, համատեղ ջանքեր՝ չեզոքացնելու անօրինական ցանցերը, կանխելու ավանդական և նոր տեսակի հանցագործությունները, այդ թվում՝ ահաբեկչությունը, թմրամիջոցների ապօրինի շրջանառությունը, մարդկանց թրաֆիքինգը, կոռուպցիան, կիբերհանցագործությունը, փողերի լվացումը և այլն։

Վստահ եմ, որ ձեր համատեղ ջանքերը թույլ կտան արագ արձագանքել մեր ժամանակի բացասական գործընթացներին և ապահովել մեր պետությունների և քաղաքացիների հուսալի պաշտպանությունը։

Կարծում եմ, որ ԱՊՀ անդամ պետությունների գլխավոր դատախազների համակարգող խորհրդի այսօրվա նիստը խթան կհանդիսանա՝ մեր տարածաշրջանում մարդու իրավունքների և ազատությունների հուսալի պաշտպանությանը, ջանքերը միավորելու հանցավորության բոլոր ձևերի դեմ պայքարում և փոխադարձ համագործակցության առավել արդյունավետ իրականացմանը։

Փոխանցում եմ Ձեզ իմ բարեմաղթանքները և հաջողություններ եմ մաղթում նիստի աշխատանքներին»։