«Հրապարակ». Այսուհետ հայ ժողովուրդն ունենալու է ծառայի կարգավիճակ

«Մինչև ղարաբաղյան վերջին՝ 44-օրյա պատերազմը համոզված կարող էի բարձրաձայնել, որ հայ ժողովուրդն իր հայրենիքը սիրող ժողովուրդ է և հանուն հայրենիքի փրկության կարող է զոհել անգամ ամենաթանկը` կյանքը: Ցավոք, 44-օրյա պատերազմի և դրանից հետո ծավալված իրադարձությունները լրիվ այլ բանի մասին են խոսում»:

Ինչպես տեղեկացնում է Caliber.Az-ը, այս մասին գրում է Անանիա Մաղաքյանը «Հրապարակ» թերթում հրապարակված հոդվածում:

«Հենց այն հանգամանքը, որ մեր ժողովուրդը համակերպվեց նոյեմբերի 9-ի խայտառակ համաձայնագրի հետ, կարծես պարզ դարձավ, որ կհամակերպվի ոչ միայն Ղարաբաղի կորստի հետ, այլև պատրաստ է անգամ մի շարք տարածքներ հանձնել թշնամուն: Եվ այս երևույթի իրական անունը ոչ թե պատերազմից խուսափելն է, այլ զուտ վախը:

Իհարկե, պատերազմի ժամանակ և դրանից հետո մեր խայտառակ՝ պարտվողական դիվանագիտության պատճառով պարզորոշ տեսանք, որ աշխարհում մենք միայնակ ենք մնացել, և ոչ մի երկիր չի ցանկանում մեր կողքին կանգնել և մեզ պաշտպանել, բայց դա բնավ չի նշանակում, որ մենք մեզ այսքան վախկոտ պիտի պահենք ու առանց չնչին դիմադրության` խելոք գառան նման, թշնամուն հանձնենք այն ամենը, ինչի վրա նա մատը կդնի:

Ես բացառում եմ, որ համայն աշխարհում գտնվի որևէ մեկ այլ ազգ, այլ ժողովուրդ, որն անգամ ԱՄՆ-ի նման հզոր երկրի կողմից իրենից մի թիզ հող ուզելու դեպքում լուռումունջ համաձայներ այդ առաջարկին ու չփորձեր ամենավերջին միջոցներով դիմակայել դրան: Այսուհետ մենք ունենալու ենք առավելագույնը կամակատարի՝ ծառայի կարգավիճակ, - գրում է Մաղաքյանը: