Արևմտյան Ադրբեջանի համայնքը արձագանքել է G7-ի հայտարարությանը

Թեև ապրիլի 17-19-ին Իտալիայի Կապրի կղզում կայացած Յոթնյակի (G7) երկրների արտաքին քաղաքական գերատեսչությունների ղեկավարների հանդիպման արդյունքներով արված հայտարարությունը պարունակում է Ադրբեջանին ուղղված կոչ՝ «փախստականների» վերադարձի իրավունքն ապահովելու վերաբերյալ, Հայաստանին նման կոչ չի եղել՝ կապված արտաքսված ադրբեջանցիների վերադարձի իրավունքի հետ։

AZERTAC-ի փոխանցմամբ՝ այս մասին ասվում է Արևմտյան Ադրբեջան համայնքի հայտարարության մեջ։

Դրանում նշվում է, որ սա էթնիկ և կրոնական խտրականություն է Հայաստանից վտարված ադրբեջանցիների նկատմամբ։ Արևմտյան Ադրբեջանի համայնքը բազմիցս դիմել է G7-ում ներկայացված բոլոր պետություններին, ինչպես նաև Եվրամիությանը՝ խնդրելով աջակցել ադրբեջանցիների՝ Հայաստան վերադառնալու իրավունքին։ Տվյալ դեպքում G7-ի երկրների բացահայտ խտրականությունը հակասում է մարդու իրավունքների պաշտպանության սկզբունքներին և վնասում ադրբեջանա-հայկական հարաբերությունների կարգավորման գործընթացին։

«Արևմտյան Ադրբեջանի համայնքը կոչ է անում G7 երկրներին հարգել բոլոր մարդկանց արժանապատվության և հավասարության սկզբունքը՝ անկախ նրանց էթնիկ և կրոնական ծագումից, խտրականություն չդրսևորել Հայաստանից վտարված ադրբեջանցիների նկատմամբ և հարգել նրանց վերադարձի իրավունքը», ընդգծվում է փաստաթղթում: