Ադրբեջանի ԱԳՆ. Զանգեզուրի միջանցքը չի կտրում Իրանի սահմանը Հայաստանի հետ

Գերագույն գլխավոր հրամանատարը շնորհավորել է ադրբեջանական և իրանական ժողովուրդներին՝ 44-օրյա Հայրենական պատերազմի ժամանակ ադրբեջանա-իրանական սահմանի ազատագրման կապակցությամբ, որը գտնվում էր օկուպացիայի տակ։ Ադրբեջանական կողմը Իրանի հետ սահմանները գնահատում է որպես առևտրի և համագործակցության հետագա զարգացման հնարավորություն։

Caliber.Az-ի փոխանցմամբ՝ այս մասին ասել է Ադրբեջանի ԱԳՆ մամուլի քարտուղար Լեյլա Աբդուլլաեւան՝ պատասխանելով «Իրանական կողմը Զանգեզուրի միջանցքն ընկալում է որպես իրանա-հայկական սահմանի հատում հարցին։ Այս հարցը քննարկվե՞լ է իրանական կողմի հետ շփումների ժամանակ»։

«Հայկական օկուպացիայի հետևանքով երկաթուղային հաղորդակցությունն ընդհատվել է ոչ միայն Նախչըվանի Ինքնավար Հանրապետության, որը հանդիսանում է Ադրբեջանի անբաժանելի մասը, այլ նաև Իրանի հետ։ 2020 թվականի նոյեմբերի 10-ի եռակողմ հայտարարության համաձայն, հանձնաժողովում՝ տարածաշրջանում հաղորդակցությունների բացման և վերականգնման շուրջ քննարկումները շարունակվում են։ Զուգահեռաբար ադրբեջանական կողմը համաձայնագիր է ստորագրել Իրանի հետ ենթակառուցվածքի ստեղծման մասին, որը կանցնի Իրանի տարածքով և կկապի Ադրբեջանի Արևելյան Զանգեզուրի տնտեսական շրջանը Նախչըվանի Ինքնավար Հանրապետության հետ։ Ձեռք բերված պայմանավորվածության համաձայն՝ 2022 թվականի սեպտեմբերի 22-ին Զանգիլանի շրջանում տեղի է ունեցել ճանապարհային կամրջի տեղադրման արարողություն՝ երկու երկրների պաշտոնյաների մասնակցությամբ։ Այն պնդումը, թե Զանգեզուրի միջանցքը կտրում է Իրանի և Հայաստանի սահմանը, սկզբունքորեն սխալ է և հեռու իրականությունից։ Ընդհակառակը, Զանգեզուրի միջանցքը կարևոր նախագիծ է, որը խորացնում է մեր երկրների հարաբերությունները և խոստանում տարածաշրջանային համագործակցության նոր հեռանկարներ»,- ասել է ԱԳՆ քարտուղարը։