Ջեյհուն Բայրամովը հանդիպել է ԵԱՀԿ ԽՎ նախագահի հետ ԼՈՒՍԱՆԿԱՐ

Ադրբեջանի արտգործնախարար Ջեյհուն Բայրամովը՝ Լոձ քաղաքում ԵԱՀԿ ԱԳ նախարարների խորհրդի 29-րդ նիստին մասնակցելու շրջանակներում հանդիպել է՝ ԵԱՀԿ Խորհրդարանական վեհաժողովի նախագահ Մարգարետա Սեդերֆելտի հետ։

ԱԳՆ-ից Caliber.Az-ին հայտնել են, որ հանդիպմանը մտքերի փոխանակություն է տեղի ունեցել՝ Ադրբեջանի և ԵԱՀԿ ԽՎ-ի միջև հարաբերությունների զարգացման հեռանկարների, ԵԱՀԿ ԽՎ օրակարգային հարցերի, ինչպես նաև տարածաշրջանում տեղի ունեցող վերջին գործընթացների, Ադրբեջանի և Հայաստանի միջև հարաբերությունների կարգավորման գործընթացում ԵԱՀԿ ԽՎ-ի հնարավոր ավանդի շուրջ։

Նախարար Ջեյհուն Բայրամովը ԵԱՀԿ ԽՎ նախագահին տեղեկացրել է տարածաշրջանում տիրող իրավիճակի մասին, այդ թվում՝ օկուպացիայից ազատագրված տարածքներում ընթացող վերակառուցման և շինարարական աշխատանքների, ականային սպառնալիքների, ինչպես նաև Հայաստանի հետ հարաբերությունների կարգավորման ուղղությամբ Ադրբեջանի ձեռնարկած քայլերի մասին։ Նա նշել է, որ չնայած Հայաստանի սադրանքներին և գործընթացները դանդաղեցնելու քաղաքականությանը, Ադրբեջանը կշարունակի ջանքերը տարածաշրջանում խաղաղության և կայունության ապահովման բոլոր կարևոր ուղղություներում, ներառյալ ապագա խաղաղության պայմանագրի ստորագրումը, սահմանների սահմանազատումը, բոլոր հաղորդակցությունների բացումը և այլ հարցեր:

Մարգարետա Սեդերֆելտը նշել է, որ ԵԱՀԿ ԽՎ-ն մեծ նշանակություն է տալիս Ադրբեջանի հետ համագործակցությանը, ինչպես նաև ընդգծել է՝ տարածաշրջանում խաղաղության և անվտանգության ապահովման կարևորությունը և հայտնել է ԵԱՀԿ ԽՎ-ի պատրաստակամությունը՝ խթանելու միջխորհրդարանական երկխոսությունը՝ աջակցելու խաղաղ գործընթացին։