Էլչին Ամիրբեկով. Հայաստանը պետք է հասկանա, որ խաղաղությունն այլընտրանք չունի

Երևանը պետք է հասկանա, որ խաղաղությունն այլընտրանք չունի, և Ադրբեջանն ու Հայաստանը կրկին պետք է դառնան լավ հարևաններ՝ շրջելով թշնամության ու առճակատման էջը։

Ինչպես հայտնում է Caliber.Az-ը, այս մասին Վատիկանի FarodiRoma լրատվական պորտալին տված հարցազրույցում ասել է՝ Ադրբեջանի առաջին փոխնախագահի օգնական Էլչին Ամիրբեկովը։

Նրա խոսքով, Հայաստանն ավելի քան չորս ամիս արգելափակում է խաղաղ գործընթացը՝ հրաժարվելով ուղիղ բանակցություններ վարել Ադրբեջանի հետ։

«Հրադադարի մասին համաձայնագրի կնքումից երկու տարի անց, Հայաստանը շարունակում է կոպտորեն խախտել դրա դրույթները՝ հրաժարվելով Ադրբեջանի Ղարաբաղի տարածաշրջանից դուրս բերել շուրջ 10 հազարանոց զինված ուժերը։ Բացի այդ, Հայաստանն օգտագործում է Լաչինի ճանապարհը զենքի, հակահետևակային ականների և ռազմական անձնակազմի ապօրինի տեղափոխման համար՝ Ադրբեջանի ինքնիշխան տարածքում իր անօրինական ռազմական ներկայությունն էլ ավելի ամրապնդելու համար»,- ասել է նա։

«Այս ամենը շատ վտանգավոր է դարձնում տարածաշրջանում առկա իրավիճակը»,- ընդգծել է Ամիրբեկովը՝ կոչ անելով Հայաստանին զերծ մնալ ռևանշիստական դիրքորոշումից և վերադառնալ Ադրբեջանի հետ բանակցությունների սեղանի շուրջ։