Ջեյհուն Բայրամովը Իսրայելի նախագահին տեղեկացրել է Հայաստանի սադրանքների մասին ԼՈՒՍԱՆԿԱՐ

Ադրբեջանի արտգործնախարար Ջեյհուն Բայրամովը մարտի 30-ին Իսրայել կատարած պաշտոնական այցի շրջանակներում հանդիպել է Իսրայելի նախագահ Իցհակ Հերցոգի հետ։

Ինչպես Caliber.Az-ին հայտնել են ԱԳՆ-ից, հանդիպմանը քննարկվել են Ադրբեջանի և Իսրայելի միջև երկկողմ և բազմակողմ համագործակցության արդիական հարցեր, տարածաշրջանային և միջազգային իրավիճակը։

Ջեյհուն Բայրամովը նշել է, որ երկու երկրների միջև դիվանագիտական հարաբերությունների հաստատումից հետո 30 տարիների ընթացքում հաջողություններ են գրանցվել տարբեր ուղղություններում, մասնավորապես՝ քաղաքականության, տնտեսության, անվտանգության, մշակույթի, կրթության, բարձր տեխնոլոգիաների, կիբերանվտանգության և այլ ոլորտներում։

Նա ընդգծել է, որ Ադրբեջանի և Իսրայելի ղեկավարների սերտ շփումները կարևոր դեր են խաղում հարաբերությունների զարգացման գործում։ Ջեյհուն Բայրամովը հայտարարել է, որ 2021 թվականին Իսրայելում Ադրբեջանի առևտրային և զբոսաշրջային ներկայացուցչությունների և Ադրբեջանի դեսպանատան բացումը երկկողմ հարաբերությունների զարգացման ցուցիչ է։

Ջեյհուն Բայրամովը Իցհակ Հերցոգին տեղեկացրել է նաև հետհակամարտային շրջանում տարածաշրջանում տիրող իրավիճակի, օկուպացիայից ազատագրված տարածքներում Ադրբեջանի կողմից իրականացվող լայնածավալ վերականգնողական աշխատանքների, Հայաստանի կողմից իրականացվող ռազմաքաղաքական սադրանքների մասին: Նախարարն ընդգծել է, որ հայկական կողմը խուսափում է կատարել ստանձնած պարտավորությունները, ադրբեջանական տարածքներում շարունակվում է ականային սպառնալիքը։

Նա հայտարարել է, որ Հայաստանը դեռ ամբողջությամբ դուրս չի բերել իր զինված ուժերը Ադրբեջանի տարածքներից, շարունակում է իր ագրեսիվ հռետորաբանությունը: Բայրամովն ընդգծել է, որ Ադրբեջանը վճռական է տարածաշրջանում խաղաղություն և անվտանգություն հաստատելու, ինչպես նաև հայ բնակիչներին վերաինտեգրելու հարցում։