Պետրիշենկոն՝ Ղարաբաղի վերածննդին նպաստելու Բելառուսի պատրաստակամության մասին

Ադրբեջանը և Բելառուսը մինչև 2030 թվականը փոխադարձ առևտրի ծավալը աստիճանաբար կհասցնեն մինչև 1 միլիարդ ԱՄՆ դոլարի։

Ինչպես հայտնում է Caliber.Az-ը՝ հղում անելով ԲԵԼՏԱ պետական գործակալությանը, այս մասին մայիսի 28-ին Ադրբեջանի Անկախության օրվան նվիրված միջոցառմանը հայտարարել է Բելառուսի փոխվարչապետ Իգոր Պետրիշենկոն։

«Մենք որոշել ենք էապես ընդլայնել արտադրական համագործակցությունը. տրակտորների հետ միասին Ադրբեջանում կհավաքենք կոմունալ, հակահրդեհային և այլ տեխնիկա, ինչպես նաև բելառուսական վերելակներ»,- ասել է փոխվարչապետը։

Նա նաև ասել է, որ Բելառուսն ու Ադրբեջանը ծրագրում են դեղերի և անասնաբուժական դեղամիջոցների համատեղ արտադրություն հիմնել, ինչպես նաև պարարտանյութեր արտադրել։

«Բելառուսը պատրաստ է իր կոնկրետ ներդրումն ունենալ Ղարաբաղի տնտեսական շրջանի վերածննդի գործում։ Մեր հիմնական ծրագրերից մեկը կլինի Աղդամի շրջանում ինտեգրված ժամանակակից գյուղատնտեսական ավանի ստեղծումը»,- ասել է Պետրիշենկոն։

Նա հավելել է, որ նախատեսվում է նաև Ղարաբաղում կառուցել մուլտիբրենդային սպասարկման կենտրոն՝ բելառուսական տեխնիկան սպասարկելու համար։