Ադրբեջանցի զինծառայողները Կարսում մասնակցում են «Eternity 2025» զորավարժություններին ԼՈՒՍԱՆԿԱՐ

Ադրբեջանի, Վրաստանի և Թուրքիայի պաշտպանության նախարարությունների միջև ռազմական համագործակցության պլանի համաձայն՝ Թուրքիայի Կարս նահանգում տեղի են ունենում «Eternity 2025» հրամանատարաշտաբային եռակողմ զորավարժություններ՝ համակարգչային աջակցությամբ:

Այս մասին Caliber.Az-ին հայտնել են Ադրբեջանի պաշտպանական գերատեսչությունից։

Զորավարժությունները, որոնք բաղկացած կլինեն համակարգչային աջակցության և գործնական վարժությունների երկու փուլից, հիմնված են երեք երկրների տարածքներով անցնող ռազմավարական օբյեկտների և կապի գծերի մարտավարական պաշտպանության սցենարի վրա։

Համատեղ հրամանատարաշտաբային զորավարժությունները, որոնցում Ադրբեջանը ներկայացված է ադրբեջանական բանակի զինծառայողներով և Ռազմավարական օբյեկտների պաշտպանության պետական գործակալության աշխատակիցներով, կշարունակվեն մինչև հոկտեմբերի 24-ը։