Ադրբեջանի արտգործնախարարը խոսել է հայ մեղադրյալների ազատ արձակման մասին

Մարդկության դեմ հանցագործությունների մեջ մեղադրվող Հայաստանի քաղաքացիներին ազատ արձակելու հարցում Ադրբեջանը կգործի բացառապես օրենքի շրջանակներում։

Report-ի փոխանցմամբ՝ այս մասին հայտարարել է Ադրբեջանի արտգործնախարար Ջեյհուն Բայրամովը՝ պատասխանելով լրագրողների հարցերին 2025 թվականի արդյունքներին նվիրված ճեպազրույցում:

«Մենք բազմաթիվ կոչերի ենք հանդիպել Ադրբեջանում ձերբակալված հայազգի անձանց ազատ արձակելու վերաբերյալ։ Սակայն յուրաքանչյուր պետություն իրավունք ունի ձերբակալել իր տարածքում մարդկության դեմ հանցագործություններ կատարած անձանց։ Ադրբեջանը զգալի մարդասիրություն է ցուցաբերել՝ 2023 թվականի հակաահաբեկչական միջոցառումներից հետո ապահովելով զինված խմբավորումների ավելի քան 10 000 նախկին անդամների վերադարձը Հայաստան։ Ինչ վերաբերում է Ադրբեջանում դատապարտված կամ հետաքննության տակ գտնվող 23 անձանց, նրանք ծանր հանցագործություններ են գործել», - ընդգծել է նախարարը։